ന്യൂയോര്‍ക്ക്: അമേരിക്കയില്‍ ലാന്റിങ്ങിനിടെ മുന്‍ചക്രം തകര്‍ന്ന് വിമാനം മൂക്കുകുത്തി. അപകടത്തില്‍ പത്തു പേര്‍ക്ക് പരിക്കേറ്റു. ലാന്റിങ്ങിനിടെ വിമാനത്തിന്റെ മുന്‍ചക്രം തകര്‍ന്ന് റണ്‍വെയില്‍ നിന്നും തെന്നി മാറി സമീപത്തെ പുല്‍മേടിലേക്ക് കയറുകയായായിരുന്നു. ഉടന്‍ തന്നെ സംഭവസ്ഥലത്തെത്തിയ അഗ്നിശമന സേന വിമാനത്തിന്റെ മുന്‍ഭാഗത്തേക്ക് ഫോം സ്‌പ്രേ ചെയ്ത് അപകടമില്ലെന്ന് ഉറപ്പു വരുത്തി.
ന്യൂയോര്‍ക്കിലെ ലാഗാര്‍ഡിയ വിമാനത്താവളത്തില്‍ എത്തിയ സൗത്ത്‌വെസ്റ്റ് എയര്‍ലൈന്‍സ് ആണ് അപകടത്തില്‍ പെട്ടത്. ടെന്നസിയിലെ നാഷ്‌വില്ലയില്‍നിന്നും പുറപ്പെട്ട വിമാനത്തില്‍ 143 യാത്രക്കാരും ആറ് ജീവനക്കാരുമടക്കം 149 പേരുണ്ടായിരുന്നു. പരിക്കേറ്റ ആരുടെയും നില ഗുരുതരമല്ലെന്ന് എയര്‍പോര്‍ട്ട് ജനറല്‍ മാനേജര്‍ ടോം ബോസ്‌കോ അറിയിച്ചു. സംഭവത്തെ തുടര്‍ന്ന് വിമാനത്താവളം താല്‍ക്കാലികമായി അടച്ചിട്ടെങ്കിലും പിന്നീട് തുറന്നു.
വിമാനം അപകടത്തില്‍ പെടാനിടയായതിനെ കുറിച്ച് അമേരിക്കയിലെ ഫെഡറല്‍ ഏവിയേഷന്‍ അധികൃതര്‍ അന്വേഷണം നടത്തും. അടുത്തിടെ ദക്ഷിണ കൊറിയന്‍ വിമാനമായ ആസിയാന-214 സാന്‍ഫ്രാന്‍സിസ്‌കോ വിമാലത്താവളത്തില്‍ തകര്‍ന്നുവീണതിനെ തുടര്‍ന്ന് മൂന്നുപേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകയും ചെയ്തിരുന്നു.
