കൊച്ചി: എറണാകുളം പട്ടണത്തിന്റെ ഹൃദയഭാഗത്തുള്ള ദര്ബാര്ഹാള് മൈതാനം കൂടുതല് സൗകര്യങ്ങളോടുകൂടിയ ഒരു ഓപ്പണ് എയര് തിയേറ്റര് ആയി മാറ്റുന്നതിനുവേണ്ടി ഡിസ്ട്രിക്ട് ടൂറിസം പ്രമോഷന് കൗണ്സില് നടത്തിക്കൊണ്ടിരിക്കുന്ന നവീകരണ പ്രവര്ത്തനത്തിന്റെ ഭാഗമായി നിര്മ്മിച്ചുകൊണ്ടിരിക്കുന്ന ചുറ്റുമതിലിന് മുകളിലുള്ള ഇരുമ്പ് വേലി അശാസ്ത്രീയവും ദുരന്ത ദായകവുമായ ഒന്നാണെന്നും അത് പൊളിച്ചുമാറ്റി വരാനിരിക്കുന്ന ഒരു വന് ദുരന്തത്തെ ഒഴിവാക്കണമെന്ന ആവശ്യവുമായി വിവിധ ഹിന്ദു സംഘടനകളുടെ നേതൃത്വത്തില് മൈതാനത്തിന് മുന്നില് ഉപരോധസമരം നടത്തി.
ആയിരക്കണക്കിനാളുകള് കൂടുന്ന വിവിധ പരിപാടികളും എറണാകുളം ശിവക്ഷേത്രത്തിലെ ഉത്സവം പ്രമാണിച്ച് അനേകം ആനകളും ആളുകളും പങ്കെടുക്കുന്ന വിവിധ ചടങ്ങുകളും നടക്കുന്ന ഈ മൈതാനത്ത് എന്തെങ്കിലും അത്യാഹിതം സംഭവിച്ചാല് ഉള്ളിലുള്ള ആള്ക്കൂട്ടത്തിന് വളരെ വേഗം രക്ഷപ്പെടുവാന് സാധിക്കുന്ന തരത്തിലായിരുന്നു ഇതുവരെ നിലനിന്ന മതില്. എന്നാല് പുതിയ ഇരുമ്പുവേലി ഇതിന് മുകളില് കെട്ടുന്നതോടുകൂടി അത്തരത്തിലുള്ള രക്ഷാമാര്ഗം നഷ്ടപ്പെടുന്നതുവഴി ഒരു വലിയ ദുരന്തം മുന്നില് കണ്ടുകൊണ്ടാണ് ഇതിനെതിരെ പ്രക്ഷോഭം സംഘടിപ്പിക്കുന്നതെന്നും ഉപരോധ സമരത്തെ അഭിസംബോധനം ചെയ്തുകൊണ്ട് വിശ്വഹിന്ദുപരിഷത്ത് ജില്ലാ പ്രസിഡന്റ് എസ്.ജെ.ആര്.കുമാര് അഭിപ്രായപ്പെട്ടു.
ഏതാനും വര്ഷങ്ങള്ക്ക് മുമ്പ് ആന വിരണ്ടോടിയപ്പോള് ആളുകള് രക്ഷപ്പെട്ട മാര്ഗമാണ് ഇപ്പോള് അടച്ചുകെട്ടുന്നത്. സി.ജി.രാജഗോപാല്, എ.ബി.ബിജു, ക്യാപ്റ്റന് സുന്ദരം, കെ.എസ്.ദിലീപ് കുമാര്, ബാബുരാജ് തച്ചേത്ത്, എം.എന്.ഹരി, വേണു കെ.ജി.പിള്ള, എസ്.രാജേന്ദ്രന് എന്നിവര് പ്രസംഗിച്ചു. പിന്നീട് പോലീസെത്തി സമരനേതാക്കളെ അറസ്റ്റ് ചെയ്ത് നീക്കി.
