കൊച്ചി: ആധുനിക ചികില്സാസൗകര്യങ്ങള് കേരളത്തില് ലഭ്യമാണെങ്കിലും എല്ലാവര്ക്കും ഒരുപോലെ അത് ലഭിക്കുന്നില്ലെന്ന് മുഖ്യമന്ത്രി ഉമ്മന്ചാണ്ടി പറഞ്ഞു. സാമ്പത്തികമാണ് ഇക്കാര്യത്തിലെ ഏറ്റവുംവലിയ പ്രതിബന്ധമെന്ന് അദ്ദേഹം പറഞ്ഞു.
കൊച്ചി ലേ മെറിഡിയന് കണ്വെന്ഷന് സെന്ററില് ആരംഭിച്ച മൂന്നു ദിവസത്തെ ഗ്ലോബല് ഹെല്ത്ത് കീയര് സമ്മിറ്റ് ഉദ്ഘാടനം ചെയ്യുകയായിരുന്നു മുഖ്യമന്ത്രി. അസ്സോസിയേഷന് ഓഫ് അമേരിക്കന് ഫിസിഷ്യന്സ് ഓഫ് ഇന്ഡ്യന് ഒറിജിന് (എ.എ.പി.ഐ), ഗ്ലോബല് അസോസിയേഷന് ഓഫ് ഫിസിഷ്യന്സ് ഓഫ് ഇന്ഡ്യന് ഒറിജിന് (ജി.എ.പി.ഐ.ഒ.), ഇന്ഡ്യന് മെഡിക്കല് അസോസിയേഷന് (ഐ.എം.എ) എന്നീ സംഘടനകള് സംയുക്തമായാണ് ഇന്ത്യയിലെ ആരോഗ്യമേഖലയിലെ ഏറ്റവും വലിയ സംഗമമായ ഗ്ലോബല് ഹെല്ത്ത്കെയര് സമ്മിറ്റ് സംഘടിപ്പിക്കുന്നത്.
മറ്റ് സംസ്ഥാനങ്ങള്ക്ക് മാതൃകയാക്കാവുന്ന വിധം കേരളത്തിലെ ആരോഗ്യരംഗം ഏറെ മുന്നിലാണെന്ന് ചടങ്ങില് അധ്യക്ഷതവഹിച്ച കേന്ദ്ര പ്രവാസികാര്യമന്ത്രി വയലാര് രവി പറഞ്ഞു. ഗ്രാമങ്ങളില് ജോലി ചെയ്യാന് ആവശ്യത്തിനു ഡോക്ടര്മാരെ കിട്ടാത്തതാണ് കേരളം ഇപ്പോള് നേരിടുന്ന ഒരു പ്രധാനപ്രശ്നം. ഇതിനു മാറ്റംവണമെന്നും വയലാര് രവി പറഞ്ഞു. എല്ലാ ഡോക്ടര്മാര്ക്കും രോഗികളോട് ഉത്തരവാദിത്തമണ്ടെന്നും അതുപോലെതന്നെ ഡോക്ടര്മാര്ക്കു മേല് ജോലിസമ്മര്ദ്ദവുമുണ്ടെന്നും അദ്ദേഹം പറഞ്ഞു.
സംഗമത്തിന്റെ ഭാഗമായി പുറത്തിറക്കിയ സുവനീറിന്റെ പ്രകാശനം എക്സൈസ് മന്ത്രി കെ.ബാബു നിര്വ്വഹിച്ചു. എ.എ.പി.ഐ പ്രസിഡന്റും സംഗമത്തിന്റെ മുഖ്യസംഘാടകനുമായ ഡോ.നരേന്ദ്രകുമാര് സ്വാഗതം പറഞ്ഞു. പ്രധാനമന്ത്രിയുടെ ഉപദേഷ്ടാവ് ടി.കെ.എ നായര്, മെഡ്ട്രോണിക് ചെയര്മാനും സിഇഒയുമായ ഒമാള്ഷ്രാക്ക്, മെഡിക്കല് കൗണ്സില് ഓഫ് ഇന്ത്യ ചെയര്മാന് കെ.കെ.തല്വാര്, എം.എ.എച്ച്.ഇ ഹോണററി അഡ്വൈസര് എം.എസ്.വല്യത്താന്, സംഘാടകസമിതി പ്രതിനിധി ഡോ. എസ്.എസ് കമ്മത്ത് എന്നിവര് പ്രസംഗിച്ചു. തുടര്ന്ന് സൂര്യ കൃഷ്ണമൂര്ത്തി തയ്യാറാക്കിയ വിനോദപരിപാടിയും അരങ്ങേറി.
