ഏറ്റുമാനൂര്: ഏറ്റുമാനൂര് നഗരത്തില് ഗതാഗതകുരുക്ക് തീരാശാപമാകുന്നു. സ്വകാര്യ ബസ് സ്റ്റാന്ഡില്നിന്നും പുറത്തേക്ക് ഇറങ്ങുന്ന വഴിയിലെ അശാസ്ത്രീയമായ കെട്ടിടനിര്മ്മാണവും ഗതാഗതകുരുക്കിന് ആക്കം കൂട്ടുന്നു. ഇവിടെയുണ്ടായിരുന്ന പഴയ കെട്ടിടം പുതുക്കി പണിയുന്നതിന്റെ ഭാഗമായി വഴിയിലേക്ക് ഇറക്കി നിര്മ്മാണപ്രവൃത്തികള് നടത്തുന്നതാണ് ഗതാഗതകുരുക്ക് ഉണ്ടാകുന്നതിനുള്ള കാരണമായി ഡ്രൈവര്മാര് ചൂണ്ടിക്കാട്ടുന്നത്. സ്റ്റാന്ഡില്നിന്നും യാത്രതിരിക്കുന്ന ബസുകള് പുറത്തേക്ക് വരാന് ഏറെ പ്രയാസപ്പെടുന്നു. അശാസ്ത്രീയവും അനധികൃതവുമായ കെട്ടിടനിര്മ്മാണം ഗതാഗത സൗകര്യത്തിന് വിഘാതം സൃഷ്ടിച്ചിട്ടും ബന്ധപ്പെട്ടവര് കണ്ടില്ലെന്ന മട്ട് കാണിക്കുന്നതായും ആക്ഷേപമുണ്ട്.
ഗ്രാമപഞ്ചായത്ത് ഓഫീസിന്റെ മൂക്കിനു താഴെ നടക്കുന്ന അശാസ്ത്രീയ നിര്മ്മാണ പ്രവര്ത്തനം കണ്ടില്ലെന്നു നടിക്കുന്നതിനു പിന്നില് വന് അഴിമതി ഉണ്ടെന്ന്് നാട്ടുകാര് ആരോപിക്കുന്നു. കെട്ടിടനിര്മ്മാണ നിയമങ്ങള് ലംഘിച്ചാണ് കെട്ടിടനിര്മ്മാണമെന്നും ആക്ഷേപം ഉയരുന്നു. പഞ്ചായത്ത് വക സ്ഥലവും കെട്ടിടനിര്മ്മാണത്തിനായി കയ്യേറിയതായും നാട്ടുകാര് പറയുന്നു.
നിയമം ലംഘിച്ച് നിരവധി കെട്ടിടങ്ങളാണ് ഏറ്റുമാനൂരില് നിര്മ്മിച്ചിട്ടുള്ളത്. അനധികൃത നിര്മ്മാണപ്രവൃത്തികള് ഏറെയും സര്ക്കാര് അവധി ദിവസങ്ങളിലും രാത്രിയിലുമാണ് നടത്തുന്നത്.
ഏറ്റുമാനൂരില് ഗതാഗതകുരുക്ക് സൃഷ്ടിക്കുന്നതില് അടിസ്ഥാന സൗകര്യങ്ങളില്ലാതെ പ്രവര്ത്തിക്കുന്ന മത്സ്യ മാംസമാര്ക്കറ്റിനും ചെറുതല്ലാത്ത പങ്കുണ്ട്. മത്സ്യ മാര്ക്കറ്റിലേക്ക് എത്തുന്ന വാഹനങ്ങള് സ്റ്റാന്ഡിനു മുന്നിലുള്ള വഴിയില് നിര്ത്തിയിടുന്നത് ഗതാഗതകുരുക്കിനിടയാക്കുന്നു. സ്റ്റാന്ഡിനു മുന്വശത്തുള്ള വഴിയോരകച്ചവടവും വാഹനങ്ങളുടെ സുഗമമായ ഗതാഗതത്തിന് തടസ്സം സൃഷ്ടിക്കുന്നുണ്ട്. മതിയായ ട്രാഫിക് സിഗ്നലുകളും വണ്വേ സമ്പ്രദായവും ഇല്ലാത്തതും ഏറ്റുമാനൂരില് ഗതാഗത തടസ്സത്തിന് കാരണമാണ്.
