ടെഹ്റാന്: ആണവോര്ജ വിഷയത്തില് നിരോധനം ഏര്പ്പെടുത്തിയ യൂറോപ്യന് യൂണിയന്റെ നടപടിയില് പ്രതിഷേധിച്ച് ബ്രിട്ടനും ഫ്രാന്സിനും എണ്ണവില്പ്പന നടത്തുന്നത് ഇറാന് നിര്ത്തിവച്ചു. മന്ത്രാലയത്തിന്റെ വെബ് സൈറ്റിലാണു തീരുമാനം അറിയിച്ചത്. പുതിയ ആവശ്യക്കാര്ക്കായി കയറ്റുമതി നടത്തുമെന്നും ഇറാന് വ്യക്തമാക്കി.
ബ്രിട്ടനും ഫ്രാന്സും ഇറാനില് നിന്നുള്ള എണ്ണയെ അധികം ആശ്രയിക്കുന്ന രാജ്യങ്ങളല്ല. അതിനാല് വില്പ്പന നിര്ത്തിയത് ഇരുരാജ്യങ്ങളേയും ബാധിക്കുകയുമില്ല. എന്നാല് യൂറോപ്യന് യൂണിയനിലെ മറ്റു രാജ്യങ്ങള്ക്ക്, പ്രധാനമായും ഇറ്റലിക്ക്, ഒരു മുന്നറിയിപ്പാണ് ഇറാന് ഇതിലൂടെ നല്കിയിരിക്കുന്നത്.
ഇറാനിയന് എണ്ണയെ ആശ്രയിക്കുന്ന യൂറോപ്യന് രാജ്യമാണ് ഇറ്റലി. ദിനംപ്രതി 185000 ബാരല് എണ്ണയാണ് ഇറാനില് നിന്നും ഇറ്റലി വാങ്ങുന്നത്. സ്പെയില് 161000 ബാരല് എണ്ണയും ഗ്രീസ് 103000 ബാരലുമാണ് ഇറാനില് നിന്നും വാങ്ങുന്നത്. ജൂലൈയോടെ ഇറാനില് നിന്നുള്ള എണ്ണ ഇറക്കുമതി അവസാനിപ്പിക്കാനാണു യൂറോപ്യന് യൂണിയന്റെ തീരുമാനം.
ആണവോര്ജം പ്രതിരോധ ആവശ്യങ്ങള്ക്ക് ഉപയോഗിക്കുന്നെന്ന് ആരോപിച്ചാണ് ഇറാനില് നിന്നുള്ള എണ്ണ ഇറക്കുമതി അവസാനിപ്പിക്കാന് യൂറോപ്യന് രാജ്യങ്ങള് തീരുമാനിച്ചത്. ഇറാന് യുറേനിയം നല്കുന്നതില് ഉപരോധമേര്പ്പെടുത്തുകയും ചെയ്തു. ഇതിനെതിരേ ആണവ നേട്ടങ്ങള് വെളിപ്പെടുത്തിക്കൊണ്ട് ഇറാന് ലോകരാഷ്ട്രങ്ങളെ ഞെട്ടിച്ചു. ഇതോടൊപ്പം യൂറോപ്യന് രാജ്യങ്ങളിലേക്കുള്ള എണ്ണ കയറ്റുമതിയും നിര്ത്തുമെന്നും റിപ്പോര്ട്ടുണ്ടായിരുന്നു. എന്നാല് ഇക്കാര്യം ഇറാന് നിഷേധിക്കുകയായിരുന്നു.
എന്നാല് ഇപ്പോള് വെബ് സൈറ്റിലൂടെ നിലപാടു മാറ്റം വ്യക്തമാക്കിയിരിക്കുകയാണ് ഇറാന്. രാജ്യത്ത് ഉത്പാദിപ്പിക്കുന്ന പെട്രോളിയത്തിന്റെ 18 ശതമാനം യൂറോപ്യന് രാജ്യങ്ങളിലേക്കാണ് ഇറാന് കയറ്റുമതി ചെയ്യുന്നത്.
