ഓസ്ലോ: ഇന്ത്യന് ദമ്പതിമാര്ക്ക് ഒടുവില് മക്കളെ കാണാന് നോര്വെയുടെ അനുമതി. നോര്വേയില് ഭൗമശാസ്ത്രജ്ഞനായ കൊല്ക്കത്ത സ്വദേശി അനുരൂപ് ഭട്ടാചാര്യയ്ക്കും ഭാര്യ സാഗരികയ്ക്കും വെള്ളിയാഴ്ചയാണ് മക്കളെ കാണാന് അനുമതി നല്കിയിരിക്കുന്നത്. സ്വന്തം മക്കളെ വിട്ടുകിട്ടുന്നതിന് നോര്വെ അധികൃതരുമായി ദമ്പതിമാര് സമരത്തിലാണ്.
കഴിഞ്ഞവര്ഷം മെയിലാണ് ഇവരുടെ മക്കളായ മൂന്നു വയസ്സുകാരന് അഭിജ്ഞാനെയും ഒരു വയസ്സുകാരി ഐശ്വര്യയേയും നോര്വെയിലെ ശിശുക്ഷേമ വകുപ്പ് അധികൃതര് മറ്റൊരു കുടുംബത്തിന് വളര്ത്താന് നല്കിയത്. മക്കളോട് അടുപ്പം കാണിക്കുന്നില്ലെന്നാരോപിച്ച് അനുരൂപിനും സാഗരികയ്ക്കുമെതിരെ കേസെടുക്കുകയും ചെയ്തു.
അഭിജ്ഞാന് സ്കൂളില് വികൃതി കാട്ടുന്നതായി റിപ്പോര്ട്ട് കിട്ടിയതിനെത്തുടര്ന്ന് ശിശുക്ഷേമ സമിതി ഇടപെടുകയായിരുന്നു. കുട്ടികള് അച്ഛനമ്മമാര്ക്കൊപ്പം ഒരേ കിടക്കയില് ഉറങ്ങുന്നതും കുട്ടികള്ക്ക് ഭക്ഷണം കൈകൊണ്ട് വാരിക്കൊടുക്കുന്നതും അധികൃതര് കുറ്റമായി കണ്ടു. ഇത് നിര്ബന്ധിച്ച് ഭക്ഷണം കഴിപ്പിക്കലാണെന്നാണ് അവരുടെ വാദം.
സാഗരിക കുട്ടിയെ ഒരുതവണ അടിച്ചു. കുട്ടികള്ക്ക് കളിക്കാന് സ്ഥലമില്ല, ഉചിതമായ വസ്ത്രമില്ല, കളിപ്പാട്ടങ്ങളില്ല തുടങ്ങിയ കുറ്റങ്ങളും അധികൃതര് ഉന്നയിച്ചു. അഭിജ്ഞാനും ഐശ്വര്യയ്ക്കും മാതാപിതാക്കളോട് വൈകാരിക അടുപ്പമില്ലെന്നും അധികൃതര് വിലയിരുത്തി. ഇതേത്തുടര്ന്നാണ് ഇവരെ അച്ഛനമ്മമാരില്നിന്ന് മാറ്റിയത്.
ഒപ്പം കിടത്തിയുറക്കുന്നതും ഭക്ഷണം വാരിക്കൊടുക്കുന്നതും ഇന്ത്യന് സംസ്ക്കാരത്തിന്റെ ഭാഗമാണെന്നും നോര്വീജിയന് അധികൃതര്ക്ക് തെറ്റിദ്ധാരണയുണ്ടായതാണെന്നുമുള്ള അനുരൂപിന്റേയും സാഗരികയുടേയും വാദം ശിശുക്ഷേമ സമിതി ശരിവെച്ചില്ല. കുട്ടികളുമായി ഇന്ത്യയിലേക്ക് മടങ്ങാനാണെന്ന ആവശ്യവും അംഗീകരിക്കപ്പെട്ടില്ല. മാര്ച്ച് അവസാനത്തോടെ അനുരൂപിന്റേയും സാഗരികയുടെ വിസാകാലാവധി കഴിയും.
നിയമയുദ്ധത്തിനുശേഷം അനുരൂപിന്റെ സഹോദരന് അരുണഭാസ് ഭട്ടാചാര്യയുടെ സംരക്ഷണയില് കുട്ടികളെ വിട്ടുകൊടുക്കാമെന്ന് നോര്വേ അധികൃതരുമായി ഇന്ത്യ കരാറായി. കൊല്ക്കത്തയില്നിന്ന് നോര്വേയിലെത്തിയ അവിവാഹിതനായ അരുണഭാസിന് കുട്ടികളെ വളര്ത്താനുള്ള പ്രത്യേക കൗണ്സലിംഗ് നല്കി. എന്നാല്, കുട്ടികളുടെ രക്ഷാകര്തൃത്വം ഇതുവരെ ഇദ്ദേഹത്തിന് കൈമാറിയിട്ടില്ല. എങ്കിലേ കുട്ടികളുമായി ഇന്ത്യയിലേക്ക് മടങ്ങാനാവൂ.
അതിനിടെ, അനുരൂപിന്റെ അച്ഛനമ്മമാരായ മണോടോഷും ശിഖാ ചക്രവര്ത്തിയും രാഷ്ട്രപതി പ്രതിഭാ പാട്ടീലിനെക്കണ്ട് സഹായം തേടി. ഇതേത്തുടര്ന്ന് വിദേശകാര്യമന്ത്രി എസ്.എം.കൃഷ്ണ നോര്വീജിയന് വിദേശകാര്യമന്ത്രിയുമായി ഫോണില് ബന്ധപ്പെട്ട് കുട്ടികളെ ഇന്ത്യയിലേക്ക് അയയ്ക്കാന് നടപടി സ്വീകരിക്കണമെന്ന് ആവശ്യപ്പെട്ടു. നോര്വീജിയന് അംബാസഡറെ കഴിഞ്ഞദിവസം വിളിച്ചുവരുത്തി ഇന്ത്യ പ്രശ്നം അവതരിപ്പിച്ചിരുന്നു. ഇതിന്റെ ഫലമായാണ് കുട്ടികളെ കാണാന് നോര്വെ അധികൃതര് ദമ്പതികള്ക്ക് അനുമതി നല്കിയത്.
