കൊച്ചി: സുരക്ഷാ മാനദണ്ഡങ്ങള്‍ പാലിക്കാത്തതിന്റെ പേരില്‍ ‘ആംബര്‍ എല്‍’ എന്ന ചരക്ക് കപ്പലിനെതിരെ ഇതിന് മുമ്പും പരാതി ഉയര്‍ന്നിരുന്നതായി റിപ്പോര്‍ട്ട്. ഫെബ്രുവരിയില്‍ യുഎസിലെ പോര്‍ട്ട്‌ലാന്റില്‍ ദിവസങ്ങളോളം കപ്പല്‍ തടഞ്ഞുവച്ചിരുന്നതായാണ് വിവരം.
കപ്പലിന്റെ പ്രവര്‍ത്തനം സംബന്ധിച്ച സുപ്രധാന രേഖകള്‍ പോലീസിന്റെയും കോസ്റ്റ് ഗാര്‍ഡിന്റെയും സംയുക്ത പരിശോധനയിലൂടെ കസ്റ്റഡിയിലെടുത്തിട്ടുണ്ട്. കൊച്ചിയില്‍നിന്നു മത്സ്യബന്ധനത്തിനു പോയ ബോട്ടില്‍ ‘ആംബര്‍ എല്‍’ ഇടിച്ച് മൂന്ന് മത്സ്യത്തൊഴിലാളികള്‍ കൊല്ലപ്പെട്ടിരുന്നു.
ഫോര്ട്ട്കൊച്ചി തീരത്തുനിന്ന് 30 നോട്ടിക്കല്‍ മൈല്‍ അകലെ ഞായാറാഴ്ച പുലര്‍ച്ചെ രണ്ടോടെയായിരുന്നു മത്സ്യബന്ധനത്തിനു പോയ ബോട്ടില്‍ കപ്പല്‍ ഇടിച്ചത്. തോപ്പുംപടി ഹാര്‍ബറില്‍നിന്നു വെള്ളിയാഴ്ച പുറപ്പെട്ട കാര്‍മല്‍മാത ബോട്ടാണ് അപകടത്തില്‍പ്പെട്ടത്. ബോട്ടിലുണ്ടായിരുന്ന മറ്റു 11 പേര്‍ നിസാര പരിക്കുകളോടെ രക്ഷപ്പെട്ടു. ഹെലികോപ്റ്ററും എം.വി. കല്‍പ്പേനിയുമാണ് രക്ഷാപ്രവര്‍ത്തനത്തില്‍ പങ്കെടുത്തത്. ഇസ്രയേലില്‍ നിന്ന് കൊച്ചി തീരം വഴി സഞ്ചരിക്കുകയായിരുന്നു ആംബര്‍ എന്നാണ് ലഭ്യമായ വിവരം.
പുറംകടലില്‍ നങ്കൂരമിട്ട്, തൊഴിലാളികള്‍ ഉറങ്ങുന്നതിനിടെയാണ് കപ്പല്‍ ബോട്ടിലിടിച്ചത്. ബോട്ട് ചിതറിത്തെറിച്ചു. നിലവിളി ശബ്ദം കേട്ട, സമീപത്തുണ്ടായിരുന്ന സെന്റ് ആന്റണീസ് ബോട്ടിലെ ജീവനക്കാരാണ് രക്ഷാപ്രവര്‍ത്തനം നടത്തിയത്. അവര്‍ നാവികസേനയേയും തീരസേനയേയും വിവരമറിയിച്ചു. നിര്‍ത്താതെ പോയ കപ്പല്‍ നാവികസേനയും തീരദേശ പോലീസുമാണ് പിന്തുടര്‍ന്ന് പിടിച്ചത്.
ബോട്ട് കപ്പല്‍ചാലിലായിരുന്നില്ലെന്ന് തൊഴിലാളികള്‍ പറഞ്ഞു. വഴിതെറ്റി വന്ന കപ്പല്‍ ബോട്ടില്‍ ഇടിക്കുകയായിരുന്നു. തോപ്പുംപടി കേന്ദ്രീകരിച്ച് മത്സ്യബന്ധനം നടത്തുന്ന പള്ളുരുത്തി സ്വദേശി എം.എന്‍. നസീര്‍, തമിഴ്നാട് സ്വദേശി ഏണസ്റ്റ് എന്നിവരുടെ ഉടമസ്ഥതയിലുള്ളതാണ് കാര്‍മ്മല്‍ മാത എന്ന ട്രോള്‍ നെറ്റ് ബോട്ട്.
തകര്‍ന്ന ബോട്ടിലെ മറ്റു ജീവനക്കാരായ തമിഴ്നാട്, വാണിയ കുടി സ്വദേശികളായ ഏണസ്റ്റ് (35), നേവീസ് (34), മെര്‍ലിന്‍ (36), ആന്റണി (26), നെല്‍സണ്‍ (27), പ്രദീപ് (28), ആന്‍ഡ്രൂസ്(42), ബ്രിട്ടോ (24), ആംസ്ട്രോങ് പെനീസ് (22), കുരിശു മിഖായേല്‍ (45), തമിഴ്നാട് കീഴ്മിടാലം സ്വദേശി ആല്‍ട്ടോ (24) എന്നിവരാണ് ഫോര്ട്ട്കൊച്ചി താലൂക്ക് ആശുപത്രി, പനയപ്പിള്ളി ഗൗതം ആശുപത്രി, എറണാകുളം മെഡിക്കല്‍ ട്രസ്റ്റ് ആശുപത്രി എന്നിവിടങ്ങളില്‍ ചികത്സയില്‍ കഴിയുന്നത്.
പ്രാഥമിക പരിശോധനയില്‍ ഒന്നരക്കോടി രൂപയുടെ നഷ്ടം കണക്കാക്കുന്നു. 28 കപ്പല്‍ ജീവനക്കാരില്‍ രണ്ട് ഇന്ത്യക്കാരുള്ളതായി റിപ്പോര്‍ട്ടുണ്ട്. 17 വര്‍ഷമായി സര്‍വീസ് നടത്തുന്ന കപ്പലിന് 26,000 ടണ്‍ ഭാരമുണ്ട്.
പ്രതികരിക്കാൻ ഇവിടെ എഴുതുക: