പനജി: 2013 ലെ ലൈംഗികാതിക്രമ കേസില്‍ ശിക്ഷിക്കപ്പെട്ട തെഹല്‍ക്ക മുന്‍ എഡിറ്റര്‍-ഇന്‍-ചീഫ് തരുണ്‍ തേജ്പാല്‍ ഗോവ കോടതിയില്‍ കീഴടങ്ങി.
ബോംബെ ഹൈക്കോടതി പത്ത് വര്‍ഷത്തെ തടവ് ശിക്ഷ വിധിച്ചതിനെത്തുടര്‍ന്ന്, തേജ്പാലിനോട് മൂന്ന് ആഴ്ചയ്‌ക്കുള്ളില്‍ കീഴടങ്ങാന്‍ ആഗസ്റ്റ് 25 ന് സുപ്രീം കോടതി ഉത്തരവിട്ടിരുന്നു. തേജ്പാലിന്റെ ഹര്‍ജി സുപ്രീം കോടതിയും തള്ളിയതോടെയാണ് കീഴടങ്ങല്‍.
ഇന്ത്യന്‍ ശിക്ഷാ നിയമത്തിലെ 376 (2)( എഫ് ) (രക്ഷകനോ വിശ്വാസയോഗ്യമായ സ്ഥാനത്തോ അധികാരസ്ഥാനത്തോ ഉള്ള വ്യക്തി ഒരു സ്ത്രീയെ ബലാത്സംഗം ചെയ്യുന്നു), 354 (എ) (ലൈംഗിക പീഡനം), 354 ( ബി) (സ്ത്രീയുടെ വസ്ത്രം അഴിച്ചുമാറ്റാനുള്ള ഉദ്ദേശ്യത്തോടെ ക്രിമിനല്‍ ബലപ്രയോഗം) എന്നീ വകുപ്പുകള്‍ പ്രകാരമാണ് തേജ്പാലിനെതിരെ കുറ്റം ചുമത്തിയത്.
2013 നവംബര്‍ 7 ന് ഗോവയിലെ ബാംബോലിമിലുള്ള ഗ്രാന്‍ഡ് ഹയാത്ത് ഹോട്ടലിലെ ലിഫ്റ്റില്‍ വെച്ച് തേജ്പാല്‍ ലൈംഗികമായി പീഡിപ്പിച്ചുവെന്നാണ് സഹപ്രവര്‍ത്തകയുടെ പരാതി. 2013 നവംബറില്‍ തേജ്പാല്‍ അറസ്റ്റിലായി.
തേജ്പാലിനെ സെഷന്‍സ് കോടതി കുറ്റവിമുക്തനാക്കിയെങ്കിലും ആ വിധി ചോദ്യം ചെയ്ത് 2022-ല്‍ ഗോവ സര്‍ക്കാര്‍ സമര്‍പ്പിച്ച അപ്പീലില്‍ പത്തുവര്‍ഷം തടവിന് ബോംബെ ഹൈക്കോടതി ശിക്ഷിക്കുകയായിരുന്നു.
