നീം കരോളി ബാബയുടെ ജീവിതത്തെ ആസ്പദമാക്കി നിർമ്മിച്ച ‘ഹനുമാൻ അംശ്’ എന്ന ചിത്രം ബോക്സ് ഓഫീസിൽ വൻ വിജയം നേടി. 2 കോടി രൂപ ബജറ്റിൽ നിർമ്മിച്ച ചിത്രം 200 കോടിയിലധികം രൂപയാണ് നേടിയത്. ചിത്രത്തിലെ ‘മൈനെ തേരേ ഹി ഭരോസേ ഹനുമാൻ’ എന്ന ഗാനം ആലപിച്ച സുനിൽ ലോധി എന്ന ഗായകനും ഇപ്പോൾ ശ്രദ്ധേയനായിരിക്കുകയാണ്. ജന്മനാ കാഴ്ചശക്തിയില്ലായിരുന്നിട്ടും, സംഗീതത്തോടുള്ള അദ്ദേഹത്തിന്റെ അഭിനിവേശമാണ് ഈ ഗാനത്തിലൂടെ പ്രേക്ഷകർ അറിയുന്നത്.
പാടുമ്പോഴെല്ലാം ഹനുമാൻ സ്വാമിയുടെ രൂപം മനസ്സിൽ കാണാറുണ്ടെന്ന് സുനിൽ പറയുന്നു. “അദ്ദേഹത്തിന്റെ വിഗ്രഹം എന്റെ മനസ്സിലുണ്ട്; പാടുമ്പോൾ ഞാൻ അദ്ദേഹത്തെ ഉള്ളിൽ കാണുന്നു. അതൊരു അത്ഭുതകരമായ അനുഭവമാണ്.” ‘ഹനുമാൻ അംശ്’-ന് വേണ്ടി ഭജൻ പാടിയതോടെ സുനിൽ ലോധി ഒറ്റരാത്രികൊണ്ട് താരമായി മാറി.
സോഷ്യൽ മീഡിയയിൽ സുനിലിന്റെ ഹനുമാൻ ഭജൻ വൈറലാവുകയും 29 ദശലക്ഷത്തിലധികം പേർ ഇത് കാണുകയും ചെയ്തു. ഈ വൈറൽ ഭജൻ അദ്ദേഹത്തിന്റെ ജീവിതം തന്നെ മാറ്റിമറിച്ചു. മധ്യപ്രദേശ് മുഖ്യമന്ത്രി മോഹൻ യാദവ് അദ്ദേഹത്തിന്റെ കണ്ണിനുള്ള ചികിത്സാ സൗകര്യങ്ങൾ ഒരുക്കാമെന്ന് ഉറപ്പ് നൽകിയിട്ടുണ്ട്. മാത്രമല്ല മോഹൻ യാദവ് സുനിൽ ലോധിയെ കാണുകയും ഒരു ലക്ഷം രൂപ പാരിതോഷികം നൽകുകയും ചെയ്തു.
മുൻപ് തന്നെ അന്ധനെന്ന് വിളിച്ച് തന്റെ ഗ്രാമത്തിലുള്ളവർ പരിഹസിക്കുമായിരുന്നു. എന്നാൽ ഇന്ന് പരിഹസിച്ചവർ തന്നെ കാണാനും, അഭിനന്ദിക്കാനും എത്തുന്നത് ഹനുമാന്റെ അനുഗ്രഹമായാണ് കാണുന്നതെന്നും സുനിൽ ലോധി പറഞ്ഞു.
