നടൻ കൊച്ചിൻ ഹനീഫയുടെ കുടുംബത്തെ സന്ദർശിച്ച് നടി ലിസി. വെണ്ണലയിലെ അംബേദ്കർ റോഡിലുള്ള ഹനീഫയുടെ പുതിയ വീടായ ‘കൊച്ചിൻ ഹനീഫാസ് എ ബി മൻസിലി’ലെത്തിയാണ് ലിസി കുടുംബത്തോടൊപ്പം സമയം ചെലവഴിച്ചത്. കൊച്ചിൻ ഹനീഫയുടെ ഭാര്യ ഫാസില, മക്കൾ, ഫാസിലയുടെ സഹോദരൻ ഫിറോസ് എന്നിവരെ സന്ദർശിച്ച ലിസി, കുടുംബത്തോടൊപ്പം ഭക്ഷണവും കഴിച്ച ശേഷമാണ് മടങ്ങിയത്.
ഫാസിലയുടെ സഹോദരൻ ഫിറോസാണ് സോഷ്യൽ മീഡിയയിലൂടെ ഈ വൈകാരിക നിമിഷത്തിന്റെ വീഡിയോ പങ്കുവെച്ചത്. ‘താളവട്ടം’ സിനിമയിലെ “പൊൻവീണേ” എന്ന ഗാനത്തിന്റെ പശ്ചാത്തലത്തിൽ പങ്കുവെച്ച വിഡിയോയിൽ, “ചില ബന്ധങ്ങൾ അങ്ങനെയാണ്… കൊച്ചിൻ ഹനീഫിക്കയുടെ എബി മൻസിലിലേക്ക് ലിസി എത്തിയപ്പോൾ അത് വെറുമൊരു സന്ദർശനമായിരുന്നില്ല, വർഷങ്ങൾക്കപ്പുറത്തേക്കും നീളുന്ന സ്നേഹബന്ധത്തിന്റെ വരവായിരുന്നു.” എന്ന് ഫിറോസ് കുറിച്ചു.
കൊച്ചിൻ ഹനീഫ തനിക്ക് നൽകിയ പിന്തുണയെക്കുറിച്ച് ലിസി സന്ദർശനവേളയിൽ ഓർത്തെടുത്തു. ഹനീഫിക്ക തനിക്ക് വേണ്ടി ചെയ്തതിന്റെ ഒരംശം പോലും തിരിച്ചു നൽകാൻ കഴിഞ്ഞിട്ടില്ലെന്ന് വ്യക്തമാക്കിയ ലിസി, അദ്ദേഹത്തിന്റെ വേർപാടിനു ശേഷം രണ്ട് പെൺകുട്ടികളെയും തനിച്ചു വളർത്തിയ ഫാസിലയെ ചേർത്തുപിടിച്ച് അഭിനന്ദിച്ചു. പ്രയാസകരമായ ഘട്ടങ്ങളിൽ കുടുംബത്തിന് പൂർണ പിന്തുണയുമായി ഒപ്പം നിന്ന ഫിറോസിനും ലിസി നന്ദി അറിയിച്ചു.
കൊച്ചിൻ ഹനീഫയുടെ അവസാന നാളുകളിൽ ആശുപത്രിയിലടക്കം കുടുംബത്തോടൊപ്പം ചേർന്നുനിന്ന് വലിയ സഹായങ്ങൾ ചെയ്ത വ്യക്തിയാണ് ലിസിയെന്ന് ഫിറോസും വിഡിയോയിൽ വ്യക്തമാക്കുന്നു.
