കംസവധത്തിനുശേഷം കൃഷ്ണന്റെ ജീവിതം മഥുരയില്‍ മാത്രം ഒതുങ്ങുന്നില്ല. പിന്നീട് പലതവണ മഥുരയ്‌ക്കുനേരെ ആക്രമണങ്ങള്‍ ഉണ്ടാകുന്നു. ജനങ്ങളുടെ സുരക്ഷയും രാജ്യത്തിന്റെ ഭാവിയും മുന്നില്‍ക്കണ്ട കൃഷ്ണന്‍ ഒടുവില്‍ ദ്വാരകയിലേക്ക് മാറാന്‍ തീരുമാനിക്കുന്നു. ആ പലായനം പരാജയമല്ല, സുരക്ഷിതമായ പുതിയൊരു ജീവിതക്രമം സൃഷ്ടിക്കാനുള്ള ഉചിത തീരുമാനമായിരുന്നു.
ഈ കഥാസന്ദര്‍ഭം വായിക്കുമ്പോള്‍, എപ്പോള്‍ തുടരണമെന്നും എപ്പോള്‍ മാറണമെന്നും തിരിച്ചറിയാനുള്ള വിവേകത്തെക്കുറിച്ചുള്ള ചിന്തയാണ് ആധുനികകാലത്ത് ഈ കഥാസന്ദര്‍ഭം മുന്നിലെത്തിക്കുന്നത്.
കൃഷ്ണസന്ദേശം
മാറ്റം എല്ലായ്‌പ്പോഴും തോല്‍വിയല്ല; ചിലപ്പോള്‍ മുന്നോട്ട് പോകാനുള്ള ഏറ്റവും ബുദ്ധിപരമായ വഴിയാണ്. ഒരേ സ്ഥലത്ത് പിടിച്ചുനില്‍ക്കുന്നതാണ് ധൈര്യമെന്ന് നമ്മള്‍ പലപ്പോഴും കരുതുന്നു. എന്നാല്‍ സാഹചര്യങ്ങള്‍ മാറിയിട്ടും പഴയ രീതിയില്‍ തുടരുന്നത് എല്ലായ്‌പ്പോഴും ഉചിതമല്ല. ചിലപ്പോള്‍ മാറിനില്‍ക്കേണ്ടിവരും. പുതിയ വഴി തെരഞ്ഞെടുക്കേണ്ടിവരും. പഴയ രീതികള്‍ ഉപേക്ഷിക്കേണ്ടിവരും.
ജീവിതസ്പര്‍ശം
ഇന്നും ജീവിതത്തില്‍ പലരും മാറ്റത്തെ ഭയപ്പെടുന്നു.
ഇഷ്ടമില്ലാത്ത ജോലിയില്‍ വര്‍ഷങ്ങളോളം തുടരുന്നു.
തകര്‍ന്ന ബന്ധത്തില്‍ പിടിച്ചുനില്‍ക്കുന്നു.
ഫലം തരാത്ത രീതിയില്‍ വീണ്ടും വീണ്ടും പരിശ്രമിക്കുന്നു.
സ്വന്തം വളര്‍ച്ച തടയുന്ന സാഹചര്യങ്ങളില്‍നിന്ന് പുറത്തുവരാന്‍ മടിക്കുന്നു.
”ഇത്രയും കാലം ഇതിലല്ലേ ജീവിച്ചത്” എന്നൊരു ചിന്ത പലപ്പോഴും നമ്മെ അവിടെത്തന്നെ തളച്ചിടുന്നു.
എന്നാല്‍ കഴിഞ്ഞ കാലത്ത് ശരിയായിരുന്ന ഒരു തീരുമാനം ഇന്നു ശരിയായിരിക്കണമെന്നില്ല.
ജീവിതം മാറുമ്പോള്‍ തീരുമാനങ്ങളും മാറേണ്ടിവരും.
ഒരു ജോലി ഉപേക്ഷിക്കുന്നത് പരാജയമാകണമെന്നില്ല. മറ്റൊരു ജോലി തെരഞ്ഞെടുക്കാനുള്ള ധൈര്യമായിരിക്കാം. ഒരു ബന്ധത്തില്‍നിന്ന് അകന്നുനില്‍ക്കുന്നത് സ്‌നേഹമില്ലായ്‌മയാകണമെന്നില്ല. സ്വന്തം മനസ്സിനെ സംരക്ഷിക്കാനുള്ള തീരുമാനമായിരിക്കാം. പഴയ ശീലം ഉപേക്ഷിക്കുന്നത് നഷ്ടമല്ല; പുതിയൊരു ജീവിതത്തിന് ഇടം നല്‍കലാവാം.
മാറ്റത്തിന്റെ ഏറ്റവും വലിയ ശത്രു പലപ്പോഴും ഭയം മാത്രമല്ല പരിചിതത്വത്തിലുള്ള അമിതസുഖമാണ്.
ദ്വാരകയിലേക്കുള്ള മാറ്റം പഠിപ്പിക്കുന്നത് പ്രശ്‌നങ്ങളില്‍നിന്ന് ഓടിയൊളിക്കാനല്ല. ഒരു സാഹചര്യം മാറ്റാന്‍ കഴിയാത്തപ്പോള്‍ അതില്‍ ജീവിതം നശിപ്പിക്കാതെ പുതിയൊരു സാധ്യത സൃഷ്ടിക്കുകയാണ് വേണ്ടത്.
എല്ലാ യുദ്ധവും പോരാടേണ്ടതില്ല. ചില യുദ്ധങ്ങളില്‍നിന്ന് മാറിനില്‍ക്കുന്നതും വലിയൊരു വിജയമാകാം. നമ്മുടെ ജീവിതത്തിലും മാറ്റം ആവശ്യമായ മേഖല ഉണ്ടോ എന്ന് ചിന്തിക്കണം.
പിടിച്ചുനില്‍ക്കുന്നതുകൊണ്ട് ജീവിതം മെച്ചപ്പെടുന്നില്ലെങ്കില്‍ പുതുവഴി തേടാന്‍ ഭയപ്പെടേണ്ടതില്ല.
കൃഷ്ണസ്പര്‍ശം:
മാറിനില്‍ക്കേണ്ടിടത്ത് മാറുന്നത് പിന്മാറ്റമല്ല; വിജയവഴിയിലേക്കുള്ള ആദ്യചുവടാണ്.
ജന്മഭൂമി ഓണ്‍ലൈന്‍