ബിഷ്കെക്ക്: ഭീകരവാദത്തില് ഇരട്ടത്താപ്പ് പാടില്ലെന്ന് പ്രധാനമന്ത്രി നരേന്ദ്ര മോദി.കിര്ഗിസ് റിപ്പബ്ലിക്ക് തലസ്ഥാനമായ ബിഷ്കെക്കില് ഷാംഗായ് സഹകരണ സംഘടന (SCO) രാഷ്ട്രത്തലവന്മാരുടെ സമിതിയുടെ 26-ാമത് യോഗത്തില് സംസാരിക്കുകയായിരുന്നു നരേന്ദ്ര മോദി.പാക് പ്രധാനമന്ത്രി ഷാബാസ് ഷെരീഫിന്റെ സാന്നിധ്യത്തിലാണ് ഇന്ത്യന് പ്രധാനമന്ത്രി ഇങ്ങനെ പറഞ്ഞത്.
ഉച്ചകോടിയെ അഭിസംബോധന ചെയ്യവെ ഭീകരവാദത്തിനുള്ള സാമ്പത്തിക സഹായം, ആളെ ചേര്ക്കല്, തീവ്രവാദം, ഇതിന്റെ സുരക്ഷിത താവളങ്ങള് എന്നിവയുടെ മുഴുവന് ശൃംഖലയും അവസാനിപ്പിക്കാന് എല്ലാ അംഗരാജ്യങ്ങളോടും പ്രധാനമന്ത്രി ആഹ്വാനം ചെയ്തു. ലോകത്തിന്റെ വിവിധ ഭാഗങ്ങളിലെ സംഘര്ഷങ്ങളില് മോദി ആശങ്ക പ്രകടിപ്പിച്ചു. യുദ്ധങ്ങളും സംഘര്ഷങ്ങളും ഒരു പ്രശ്നത്തിനും പരിഹാരമല്ലെന്നും എല്ലാ തര്ക്കങ്ങളും ചര്ച്ചകളിലൂടെയും നയതന്ത്രപരമായ മാര്ഗങ്ങളിലൂടെയും പരിഹരിക്കപ്പെടണമെന്നും അദ്ദേഹം പറഞ്ഞു.
വിപണികളെ ബന്ധിപ്പിക്കുകയും വ്യാപാരം സുഗമമാക്കുകയും വികസനത്തിന് പുതിയ വഴികള് തുറക്കുകയും ചെയ്യുന്ന എല്ലാ ശ്രമങ്ങളെയും ഇന്ത്യ പിന്തുണയ്ക്കുന്നു.എന്നാല്, അത്തരം ശ്രമങ്ങള് എല്ലാ രാജ്യങ്ങളുടെയും പരമാധികാരത്തെയും പ്രാദേശിക അഖണ്ഡതയെയും പൂര്ണമായും മാനിക്കണമെന്ന് അദ്ദേഹം ഊന്നിപ്പറഞ്ഞു.
കഴിഞ്ഞ വര്ഷം ‘ഷാംഗായ് സഹകരണ സംസ്കാര ചര്ച്ചാ ഫോറം’ ഭാരതം നിര്ദ്ദേശിച്ചിരുന്നത് നരേന്ദ്രമോദി ചൂണ്ടിക്കാട്ടി. ഇതിന്റെ ആദ്യ യോഗം ഈ വര്ഷം ഭാരതത്തില് നടക്കുമെന്നതില് അദ്ദേഹം സന്തോഷം പ്രകടിപ്പിച്ചു.
ഷാംഗായ് സഹകരണ സംഘടന ഉച്ചകോടിയില് പങ്കെടുത്ത ശേഷം, കിര്ഗിസ്ഥാനിലെ രണ്ട് ദിവസത്തെ സന്ദര്ശനം പൂര്ത്തിയാക്കി പ്രധാനമന്ത്രി ബിഷ്കെക്കില് നിന്ന് ന്യൂദല്ഹിയിലേക്ക് മടങ്ങി.
