ആലപ്പുഴ: ആദിശങ്കരനും ശ്രീനാരായണഗുരുവും മന്നത്ത് പത്മനാഭനും ആണ് കേരളത്തിന്റെ ഏറ്റവും വലിയ സംഭാവനകള് എന്ന് ഉപരാഷ്ട്രപതി സി.പി. രാധാകൃഷ്ണന്. ആദിശങ്കരന് ഇല്ലായിരുന്നെങ്കില് ഇന്നത്തെ ഐക്യ ഭാരതം ഉണ്ടാകുമായിരുന്നില്ല. ശ്രീനാരായണഗുരു ഇല്ലായിരുന്നെങ്കില് നമുക്കിടയില് സമത്വം ഉണ്ടാകുമായിരുന്നില്ലെന്നും എല്ലാവര്ക്കും വിദ്യാഭ്യാസം ലഭിക്കണം എന്ന ലക്ഷ്യത്തോടെ പ്രവര്ത്തിച്ച ആളാണ് മന്നത്ത് പത്മനാഭന് എന്നും അദ്ദേഹം പറഞ്ഞു. കേരള കൗമുദിയുടെ 115-ാം വാര്ഷികാഘോഷം ഉദ്ഘാടനം ചെയ്യുകയായിരുന്നു.
കേരളത്തില് വെള്ളപ്പൊക്കം ഒഴിവാക്കാന് നദികളുടെ ആഴം കൂട്ടണം. നമ്മള് പരിസ്ഥിതി ഭ്രാന്തന്മാര് ആകാന് പാടില്ലെന്നും പരിസ്ഥിതി സംരക്ഷണത്തിനൊപ്പം വികസനവും ഉറപ്പുവരുത്തണമെന്നും അദ്ദേഹം ആവശ്യപ്പെട്ടു. കേരളത്തിലെ നഗരങ്ങളില് വെള്ളപ്പൊക്കം പതിവാകുകയാണ്. നദികളിലെ ജലസംഭരണ ശേഷി കുറയുന്നതാണ് ഇതിന് കാരണം. കൃത്യമായ ഇടവേളകളില് കേരളത്തിലെ നദികളില് മണല് നീക്കം നടക്കുന്നില്ല. നമ്മുടെ കണക്കുകൂട്ടലുകള്ക്ക് അപ്പുറത്തെ മഴയാണ് ഇപ്പോള് പെയ്യുന്നത്. നദികളിലെ ആഴം കൂട്ടിയില്ലെങ്കില് വെള്ളം എങ്ങോട്ട് ഒഴുകിപ്പോകും? നദികളുടെ ആഴം കൂട്ടേണ്ട എന്ന് വാദിക്കുന്നവരോട് വെള്ളം എങ്ങോട്ട് ഒഴുകിപ്പോകും എന്ന് ചോദിക്കണം. കോടതികളാണ് തടസമെങ്കില് കോടതികളെ കാര്യം ബോധ്യപ്പെടുത്തണമെന്നും അദ്ദേഹം പറഞ്ഞു.
സംസ്ഥാനത്തിന്റെ പേര് ‘കേരളം’ എന്ന് മാറ്റിയ ബില് പാസാക്കുമ്പോള് താനായിരുന്നു രാജ്യസഭയുടെ അധ്യക്ഷത വഹിച്ചിരുന്നത്. ഒരു ചരിത്രപരമായ തെറ്റ് തിരുത്തിയതിന്റെ സന്തോഷമാണ് അംഗങ്ങളില് നിഴലിച്ചതെന്ന് അദ്ദേഹം പറഞ്ഞു. പദ്മഭൂഷന് ബഹുമതി നേടിയ എസ്എന്ഡിപിയോഗം ജനറല് സെക്രട്ടറി വെള്ളാപ്പള്ളി നടേശനെ അദ്ദേഹം ആദരിച്ചു.
ഗവര്ണര് രാജേന്ദ്ര വിശ്വനാഥ് അര്ലേക്കര്, മന്ത്രി റോജി എം. ജോണ്, എംഎല്എമാരായ ബി.ബി. ഗോപകുമാര്, എ.ഡി. തോമസ്, കേരളകൗമുദി ചീഫ് എഡിറ്റര് ദീപു രവി എന്നിവര് പങ്കെടുത്തു. രാവിലെ വ്യോമസേന ഹെലികോപ്റ്ററില് ആലപ്പുഴ പോലീസ് മൈതാനത്ത് ഇറങ്ങിയ ഉപരാഷ്ട്രപതിയെ ഗവര്ണര് രാജേന്ദ്ര വിശ്വനാഥ് ആര്ലേക്കര്, മന്ത്രി റോജി എം. ജോണ്, ജി. സുധാകരന് എംഎല്എ, ജില്ലാ കളക്ടര് ഷാജി വി. നായര്, ആലപ്പുഴ നഗരസഭ അധ്യക്ഷ മോളി ജേക്കബ്ബ്, ജില്ലാ പോലീസ് മേധാവി ടി.കെ. വിഷ്ണുപ്രദീപ് എന്നിവര് ചേര്ന്ന് സ്വീകരിച്ചു.
