പഴനി: വൈശാഖം ശ്രീമുരുക ഭക്തജന സംഘത്തിന്റെ ആഭിമുഖ്യത്തില് ഭഗവാന് മുരുകന്റെ ആറുപടൈ വീടുകളില് മൂന്നാം പട വീടായ പഴനിയില് നടന്ന മുരുക ഭക്ത സംഗമം വൈശാഖം ശ്രീമുരുക ഭക്തജന സംഘം മുഖ്യ സംയോജകന് ജയകൃഷ്ണന് വൈശാഖ് ഉദ്ഘാടനം ചെയ്തു.
തൃക്കാരിയൂര് രാമനാരായണപ്രസാദ് നമ്പൂതിരിപ്പാടിന്റെ നേതൃത്വത്തില് മഹാസ്കന്ദ ഹോമവും നടന്നു. തുടര്ന്ന് മഹാശക്തിവേല് പൂജ നടന്നു. പഴനി ന്യൂ തിരുപ്പൂര് തിരുമണ്ഡപത്തില് നിന്ന് വേല് ഘോഷയാത്ര നടന്നു. ആലപ്പുഴ വൈശാഖ് വേല് കുത്ത് സംഘത്തിന്റെ നേതൃത്വത്തില് വേല് കുത്ത് ഉണ്ടായിരുന്നു.
വഴിനീളെ ഭക്തജനങ്ങള് വേല് ഘോഷ യാത്രക്ക് സ്വീകരണം നല്കി. ഘോഷയാത്ര ആദ്യം പഴണിയുടെ മൂലസ്ഥാനമായ തിരുആവിനംകുടിയില് എത്തിച്ചേര്ന്നു. തുടര്ന്ന് പഴനിമല തിരുകോവില് എത്തി ഭഗവാന് ശ്രീമുരുകനെ രാജ അലങ്കാരത്തില് ദര്ശനം നടത്തി സമാപിച്ചു. പങ്കെടുത്ത എല്ലാവര്ക്കും വെള്ളി വേലും വിഭൂതിയും പ്രസാദമായി വിതരണം ചെയ്തു.
പഴനിമല അടിവാരം തിരുപ്പൂര് തിരുമണ്ഡപം മാനേജര് ബാലമുരുകന്, തിരുപ്രംകുണ്ഡ്രം പെരിയ മരുത് പഴനി പ്രഭാകരന്, കരുണന് കെടാമംഗലം, കെ.വി. സുനില്കുമാര്, പെരുവാരം മോഹന് സ്വാമി, സീതാകേശവം, സുരേഷ് മനക്കപ്പടി, വൈപ്പിന് സുനില്കുമാര്, രജീവ് മുല്ലശ്ശേരി, ബൈജു ആലിംഗല്, എഴിക്കര ഹരിദാസ്, എളങ്കുന്നപ്പുഴ ശശികുമാര്, രതീഷ് കൊടുങ്ങല്ലൂര്, ആദേശ് ആളംതുരുത്ത് തുടങ്ങിയവര് ചടങ്ങുകള്ക്ക് നേതൃത്വം നല്കി.
ഭഗവാന് ശ്രീമുരുകന്റെ ആറുപടൈ വീടുകളില് ഒന്നാം പടൈവീടായ തിരുപ്രംകുണ്ഡ്രത്തും രണ്ടാം പടൈവീടായ തിരുച്ചന്തൂരും മുരുകഭക്ത സംഗമങ്ങള് സംഘടിപ്പിച്ചതിനുശേഷമാണ് വൈശാഖം ശ്രീമുരുക ഭക്തജന സംഘം പഴനിയില് ഈ പരിപാടി സംഘടിപ്പിച്ചത്.
