കണ്ണൂര്: വിദ്യാര്ത്ഥികളുടെ എണ്ണം പെരുപ്പിച്ച് കാണിച്ച് ജില്ലയിലെ വിവിധ സ്കൂളുകള്ക്കെതിരെ അഴിമതി നിരോധന നിയമപ്രകാരവും ഭാരതീയ ന്യായസംഹിത പ്രകാരവും വിവിധ വകുപ്പുകള് ചേര്ത്ത് കേസ് രജിസ്റ്റര് ചെയ്യാനുള്ള അനുമതിക്കായി കണ്ണൂര് വിജിലന്സ് ഡിവൈഎസ്പി ബാബു പെരിങ്ങേത്ത് സര്ക്കാരിലേക്ക് റിപ്പോര്ട്ട് സമര്പ്പിച്ചതായി വിവരം.
എട്ട് മാസത്തോളം നേരിട്ടും അല്ലാതെയും നടത്തിയ അനേ ്വഷണത്തിലാണ് ഗുരുതരമായ ക്രമക്കേടുകള് കണ്ടെത്തിയതെന്ന വാര്ത്തയാണ് ഇന്നലെ പുറത്ത് വന്നത്. മിക്ക സ്കൂളുകളിലും തസ്തിക നില നിര്ത്താന് വേണ്ടിയാണ് കുട്ടികളുടെ എണ്ണം പെരുപ്പിച്ച് കാണിച്ചത്. ഹാജര്പ്പട്ടിക , അഡ്മിഷന് രജിസ്റ്റര് ഉച്ചഭക്ഷണ രജിസ്റ്റര് അടക്കമുള്ള നിരവധി രേഖകളില് വ്യാജ രേഖപ്പെടുത്തലുകള് വരുത്തിയിട്ടുണ്ട് എന്നതിന് പുറമേ യൂണിഫോം, പാഠപുസ്തകങ്ങള് , ഉച്ചഭക്ഷണം എന്നിങ്ങനെ സര്ക്കാരിന് സാമ്പത്തിക നഷ്ടവുമുണ്ടാക്കിയതായി അന്വേഷണത്തില് വ്യക്തമായിട്ടുണ്ട്.
പയ്യന്നൂര് , മാടായി, തളിപ്പറമ്പ നോര്ത്ത് , സൗത്ത്, ഇരിക്കൂര് ഉപജില്ലാ വിദ്യാഭ്യാസ ഓഫിസുകള്ക്ക് കീഴില് മാത്രം 11 സ്കൂളുകളില് വിദ്യാര്ത്ഥികളുടെ എണ്ണം പെരുപ്പിച്ച് കാട്ടിയിട്ടുണ്ട് ഇതിന് പുറമേ കണ്ണൂര്, തലശ്ശേരി ഭാഗങ്ങളിലെ ചില സ്കൂളുകളിലും കൃത്രിമം നടന്നതായി വിജിലന്സ് കണ്ടെത്തിയിട്ടുണ്ട്. യഥാര്ത്ഥത്തില് മറ്റ് സ്കൂളുകളില് പഠിക്കുന്ന വിദ്യാര്ത്ഥികളെ ഈ സ്കൂളുകളില് പഠിക്കുന്നതായി കാണിച്ചാണ് പ്രധാനമായും വ്യാജ രേഖകള് ചമച്ചിട്ടുള്ളത്. ചില കുട്ടികളുടെ വിലാസത്തില് വിജിലന്സ് അന്വേഷണം നടത്തിയതില് അത്തരവിലാസം കണ്ടുപിടിക്കാനായിട്ടില്ല. ഇവരെല്ലാം ഈ സ്കൂളുകളില് ഹാജരായിട്ടുള്ളതായിക്കാണിച്ചാണ് ഹാജര് പട്ടികയില് രേഖപ്പെടുത്തലുകള് വരുത്തിയിട്ടുള്ളത്. നിലവില് കേന്ദ്രീയ വിദ്യാലയത്തില് പഠിക്കുന്ന കുട്ടിയെപ്പോലും ഇപ്രകാരം തങ്ങളുടെ വിദ്യാലയത്തിലാണ് പഠിക്കുന്നതെന്ന വ്യാജ രേഖയുണ്ടാക്കിയ സ്കൂളുമുണ്ട്. കാസറഗോഡ് ജില്ലയില് പഠിക്കുന്ന കുട്ടിയെപ്പോലും ഇവിടെ പഠിക്കുന്നതായി കാണിച്ചിട്ടുണ്ട്.
തലശ്ശേരി ഭാഗത്തെ ഒരു സ്കൂളിലെ ഒരു ക്ലാസ്സില് മാത്രം 19 കുട്ടികളെ അധികമായിക്കാണിച്ച് ഹാജര് വെക്കുന്നതായും കണ്ടെത്തിയിട്ടുണ്ട്. അഞ്ചരക്കണ്ടി ഭാഗത്തെ ഒരു സ്കൂളില് തൊട്ടടുത്ത മറ്റൊരു സ്കൂളിലെ കുട്ടികളെ വ്യാജമായി ചേര്ത്തിട്ടുണ്ട്. ആദ്യഘട്ടത്തിന് പ്രധാനാധ്യാപകരും ക്ലാസ്സ് ടീച്ചര്മാരും പ്രതികളാവും. ക്രമക്കേടുകള് പരിശോധിക്കാന് ബാധ്യസ്ഥമായ ഉയര്ന്ന ഓഫിസര്മാര്ക്ക് ഇതില് പങ്കുണ്ടോ എന്ന് കേസ് രജിസ്റ്റര് ചെയ്തതിന് ശേഷം പരിശോധിക്കും. കണ്ണൂര് നഗരത്തിനടുത്തുള്ള സ്കൂള് അടക്കം ജില്ലയിലെ വിവിധ സ്കൂളുകള് വിജിലന്സ് നിരീക്ഷണത്തിലാണ്. വിജിലന്സ് ഡിവൈഎസ്പിയുടെ നേതൃത്വത്തില് മൂന്ന് സ്ക്വാഡുകളായി തിരിഞ്ഞ് നടത്തിയ അന്വേഷണത്തിലാണ് കണ്ടെത്തലുകള് എന്ന വിവരമാണ് പുറത്ത് വന്നിരിക്കുന്നത്. സര്ക്കാര് അനുമതി ലഭിച്ചാല് വിജിലന്സ് കൂടുതല് നടപടികളിലേക്ക് നീങ്ങുമെന്നറിയുന്നു.
