കൊല്ലം: ചിങ്ങമാസം പിറന്നതോടെ ഓണവിപണിയും സജീവമായി. ഓണാഘോഷങ്ങള്ക്കും പൂക്കള മത്സരങ്ങള്ക്കുമായി പൂക്കള് തേടിയെത്തുന്നവരുടെ എണ്ണം കൂടിയതോടെ ജില്ലയില് പൂവിപണിയും ഉണര്ന്നു. സ്കൂള്, കോളേജ്, ഓഫീസ്, ക്ലബ് എന്നിവിടങ്ങളിലെ ആഘോഷങ്ങള് വരും ദിവസങ്ങളില് സജീവമാകുന്നതോടെ പൂക്കളുടെ വില്പ്പന ഇനിയും വര്ധിക്കുമെന്നാണ് വ്യാപാരികളുടെ പ്രതീക്ഷ.
ആവശ്യകത ഉയരുന്നതോടെ വിലയും കൂടാനാണ് സാധ്യത. കൊട്ടാരക്കര ഉള്പ്പെടെ ജില്ലയിലെ വിവിധ ഭാഗങ്ങളില് നാടന് പൂക്കളുടെ വിളവെടുപ്പ് ആരംഭിച്ചിട്ടുണ്ട്. ബന്തി, വാടാമല്ലി, തുമ്പ, തുളസി തുടങ്ങിയ പൂക്കള് പ്രാദേശികമായി ലഭിക്കുന്നുണ്ടെങ്കിലും ഓണക്കാലത്തെ വന് ആവശ്യകത നിറവേറ്റാന് ഇവ മതിയാകില്ല. ഇതോടെ തമിഴ്നാട്ടിലെയും കര്ണാടകയിലെയും പൂക്കളെയാണ് വ്യാപാരികള് കൂടുതലായി ആശ്രയിക്കുന്നത്. മൈസൂരു, ബെംഗളൂരു, കോയമ്പത്തൂര് എന്നിവിടങ്ങളില് നിന്നാണ് പ്രധാനമായും പൂക്കള് എത്തുന്നത്.
മുല്ലപ്പൂ വില കുതിക്കുന്നു
ഓണവും വിവാഹ സീസണും ഒരുമിച്ചെത്തിയതോടെ മുല്ലപ്പൂവിന്റെ വില കുത്തനെ ഉയര്ന്നു. നിലവില് കിലോയ്ക്ക് 1,400 രൂപയാണ് വില. ഞായറാഴ്ച വില 1,500 രൂപ വരെയെത്തിയിരുന്നു. ആവശ്യകത വര്ധിച്ചതിനൊപ്പം ദൂരസ്ഥലങ്ങളില് നിന്ന് പൂക്കള് എത്തിക്കുന്നതിനുള്ള ഗതാഗതച്ചെലവും കൂടിയതാണ് വില ഉയരാന് കാരണമെന്ന് വ്യാപാരികള് പറയുന്നു. തിരുവോണം അടുക്കുന്നതോടെ വില ഇനിയും ഉയരാനാണ് സാധ്യത. കിലോയ്ക്ക് 100 രൂപയോളം വര്ധനയുണ്ടാകാമെന്നാണ് വ്യാപാരികളുടെ വിലയിരുത്തല്.
വീടുകളിലും സ്ഥാപനങ്ങളിലും ചെറിയ പൂക്കളങ്ങള് ഒരുക്കുന്നതിനുള്ള കിറ്റുകള്ക്കും ആവശ്യക്കാരേറെയാണ്. വിവിധ പൂക്കള് ചേര്ത്തൊരുക്കുന്ന 100 മുതല് 200 രൂപ വരെയുള്ള കിറ്റുകള്ക്കാണ് കൂടുതല് ആവശ്യകത. സ്കൂളുകള്, കോളേജുകള്, ഓഫീസുകള് എന്നിവിടങ്ങളിലേക്കാണ് ഇത്തരം കിറ്റുകള് കൂടുതലായി വാങ്ങുന്നത്.
