ന്യൂദല്‍ഹി: ദല്‍ഹി മെട്രോയില്‍ യാത്രക്കാരിയായ യുവതിയുടെ ചിത്രം ഫോണില്‍ പകര്‍ത്തിയ സിഐഎസ്എഫ് ജവാനെ സസ്പന്‍ഡ് ചെയ്തു. എയിംസ് മെട്രോ സ്റ്റേഷന് സമീപമായിരുന്നു സംഭവം.
മെട്രോയില്‍ ഒപ്പമുണ്ടായിരുന്ന സിഐഎസ്എഫ് ജവാന്‍ തന്റെ ചിത്രങ്ങള്‍ ഫോണില്‍ രഹസ്യമായി പകര്‍ത്തി എന്നാണ് യാത്രക്കാരി ആരോപിച്ചത്.മെട്രോ സ്റ്റേഷനില്‍ നടന്ന ഈ സംഭവം ഉന്തും തള്ളുമായി മാറുകയും തര്‍ക്കത്തിന്റെ വീഡിയോ സമൂഹമാധ്യമങ്ങളില്‍ വൈറലാവുകയും ചെയ്തു.
യാത്രക്കാര്‍ ജവാന്റെ ഫോണ്‍ പരിശോധിച്ചു. ഫോണില്‍ ചിത്രങ്ങള്‍ കണ്ടതോടെ യുവതിയടക്കമുള്ള യാത്രക്കാര്‍ ജവാനെ ചോദ്യം ചെയ്തു. സംഘര്‍ഷത്തില്‍ കലാശിക്കുകയുമായിരുന്നു. വിവാദമായതോടെ ഉന്നത ഉദ്യോഗസ്ഥര്‍ വിഷയത്തില്‍ ഇടപെട്ട് ആരോപണവിധേയനായ ജവാനെ ഉടനടി സസ്‌പെന്‍ഡ് ചെയ്യുകയും ചെയ്തു. സംഭവത്തില്‍ വകുപ്പുതല അന്വേഷണം പുരോഗമിക്കുന്നു.
