തിരുവനന്തപുരം: കേരള ക്രിക്കറ്റ് ലീഗ് മൂന്നാം സീസണിലും കാലിക്കറ്റ് ഗ്ലോബ്സ്റ്റാര്സിനെ രോഹന് കുന്നുമ്മല് തന്നെ നയിക്കും. അഖില് സകറിയ വൈസ് ക്യാപ്റ്റനായി തുടരും.
ടൂര്ണമെന്റിന്റെ ആദ്യ സീസണ് മുതല് ടീമിന്റെ പ്രധാന ഭാഗമായ ഇരുവരുടെയും പരിചയസമ്പത്തും നേതൃത്വപാടവവും വരും സീസണിലും ടീമിന് വലിയ കരുത്താകും. ക്യാപ്റ്റന് എന്ന നിലയില് രോഹനും വൈസ് ക്യാപ്റ്റനായി അഖിലും ടീമിനെ നയിക്കുമ്പോള്, കഴിഞ്ഞ സീസണുകളിലെ പ്രകടനം കൂടുതല് മെച്ചപ്പെടുത്താമെന്ന ഉറച്ച ആത്മവിശ്വാസത്തിലാണ് ഗ്ലോബ്സ്റ്റാര്സ്.
ഹെഡ് കോച്ച് ബിജുമോന് എന്.പിയുടെയും കോച്ചിങ് സ്റ്റാഫിന്റെയും മേല്നോട്ടത്തില് ടീം നിലവില് തിരുവനന്തപുരത്ത് പരിശീലനം നടത്തിവരികയാണ്. തുമ്പ ഗ്രൗണ്ടില് നടക്കുന്ന ക്യാമ്പില് ടീമിലെ 16 അംഗങ്ങളും പങ്കെടുക്കുന്നുണ്ട്.
ഓഗസ്റ്റ് 20 ന് തിരുവനന്തപുരം കാര്യവട്ടം ഗ്രീന്ഫീല്ഡ് ഇന്റര്നാഷണല് സ്റ്റേഡിയത്തില് നടക്കുന്ന ലീഗിലെ ഉദ്ഘാടന മത്സരത്തില് തൃശൂര് ടൈറ്റന്സാണ് ഗ്ലോബ്സ്റ്റാര്സിന്റെ എതിരാളികള്. ഓഗസ്റ്റ് 20 മുതല് സെപ്റ്റംബര് 5 വരെയാണ് മത്സരങ്ങള് നടക്കുന്നത്.
