പത്തനംതിട്ട : കനത്ത മഴയെ തുടര്‍ന്നുണ്ടായ വെളളക്കെട്ടില്‍ അകപ്പെട്ടവരുടെ രക്ഷയ്‌ക്കായി പ്രവര്‍ത്തിച്ച് മടങ്ങിയ വാഹനത്തിന് പിഴയിട്ട എംവിഡി ഉദ്യോഗസ്ഥര്‍ക്ക് എതിരായ സസ്‌പെന്‍ഷന്‍ പിന്‍വലിച്ചു.എംവിഡി ഉദ്യോഗസ്ഥരുടെ ശക്തമായ പ്രതിഷേധത്തെ തുടര്‍ന്നാണ് മോട്ടോര്‍ വാഹന വകുപ്പിന്റെ നടപടി. അതേസമയം, സസ്‌പെന്‍ഷന്‍ റദ്ദാക്കിയെങ്കിലും ഇവരെ സ്ഥലംമാറ്റിയിട്ടുണ്ട്.
വെള്ളപ്പൊക്ക ദുരിതാശ്വാസ പ്രവര്‍ത്തനത്തിന് എത്തിയ വാഹനത്തിലെ ലൈറ്റിനാണ് മോട്ടോര്‍ വാഹന വകുപ്പ് ഉദ്യോഗസ്ഥര്‍ 5000 രൂപ പിഴ ഇട്ടത്. തുടര്‍ന്ന് അടൂര്‍ സബ് റീജിയണല്‍ ട്രാന്‍സ്പോര്‍ട്ട് ഓഫീസിലെ അസിസ്റ്റന്റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ ലൈജു. ബി, ഷമീര്‍.എം എന്നിവരെ സസ്‌പെന്‍ഡ് ചെയ്തു. പിന്നാലെ പ്രതിഷേധവുമായി എംവിഡിജീവനക്കാര്‍ രംഗത്തെത്തി. കറുത്ത ബാഡ്ജ് ധരിച്ചായിരുന്നു ജീവനക്കാരുടെ പ്രതിഷേധം. വാഹനങ്ങള്‍ക്ക് പിഴ ഈടാക്കുന്നത് നിര്‍ത്തി വയ്‌ക്കുമെന്നും പറഞ്ഞു.ഇതിന് പിന്നാലെയാണ് രണ്ട് ജീവനക്കാരുടെയും സസ്‌പെന്‍ഷന്‍ പിന്‍വലിച്ച് സര്‍ക്കാര്‍ അടിയറവ് പറഞ്ഞത്.
ലൈജുവിനെ കഴക്കൂട്ടത്തേക്കും ഷമീറിനെ മാവേലിക്കരയിലേക്കുമാണ് മാറ്റി നിയമിച്ചത്. പിഴയിട്ടത് ശരിയായില്ലെന്ന് മന്ത്രി സി പി ജോണും പറഞ്ഞു. ഉദ്യോഗസ്ഥരുടെ പ്രതിഷേധം അച്ചടക്കലംഘനമാണെന്ന് ഗതാഗത കമ്മീഷണര്‍ നാഗരാജുവും നിലപാടെടുത്തിരുന്നു.
