ന്യൂദല്‍ഹി: പ്രധാനമന്ത്രി ആവാസ് യോജന – അര്‍ബനിന് കീഴില്‍ നിര്‍മ്മിച്ച് കൈമാറിയ വീടുകളുടെ എണ്ണം ഒരു കോടി പിന്നിട്ടു. പിഎംഎവൈ- യു. പിഎംഎവൈ- യു 2.0 പ്രകാരം 1.25 കോടി വീടുകളാണ് ഇതുവരെ അനുവദിച്ചത്. കഴിഞ്ഞദിവസം ചേര്‍ന്ന പിഎംഎവൈ-യു 2.0യുടെ കേന്ദ്ര അനുമതി – നിരീക്ഷണ സമിതി (സിഎസ്എംസി) യോഗം പുതിയതായി 2.09 ലക്ഷം വീടുകള്‍ കൂടി അനുവദിച്ചു. പ്രധാനമന്ത്രി ആവാസ് യോജന പ്രകാരം ഇതിനകം നാല് കോടി യിലധികം വീടുകള്‍ നിര്‍മിച്ചു നല്‍കിയിട്ടുണ്ട്.
ആന്ധ്ര, അരുണാചല്‍, ബീഹാര്‍, ഛത്തീസ്ഗഡ്, ഗുജറാത്ത്, ജമ്മു കശ്മീര്‍, ഝാര്‍ഖണ്ഡ്, മധ്യപ്രദേശ്, മഹാരാഷ്‌ട്ര, മണിപ്പൂര്‍, ഒഡീഷ, രാജസ്ഥാന്‍, ഉത്തര്‍പ്രദേശ്, തമിഴ്നാട് എന്നീ സംസ്ഥാനങ്ങളിലാണ് പുതിയ വീടുകള്‍ക്ക് അനുമതി നല്‍കിയത്. ഇതില്‍ 2.03 ലക്ഷം വീടുകള്‍ സ്ത്രീകള്‍ക്കും 16,662 വീടുകള്‍ മുതിര്‍ന്ന പൗരന്മാര്‍ക്കുമാണ് അനുവദിച്ചത്. 21,954 വീടുകള്‍ എസ്സി, 14,252 വീടുകള്‍ എസ്ടി, 75,511 വീടുകള്‍ ഒബിസി ഗുണഭോക്താക്കള്‍ക്കുമാണ് അനുവദിച്ചത്.
നഗരവികസന വകുപ്പ് സെക്രട്ടറി സതേന്ദ്ര സിങ് യോഗത്തില്‍ അധ്യക്ഷനായി. ജോയിന്റ് സെക്രട്ടറിയും ഹൗസിങ് ഫോര്‍ ഓള്‍ മിഷന്‍ ഡയറക്ടറുമായ കുല്‍ദീപ് നാരായണ്‍, ജോയിന്റ് സെക്രട്ടറിയും സാമ്പത്തിക ഉപദേഷ്ടാവുമായ സഞ്ജീത്, ഹൗസിങ് ഫോര്‍ ഓള്‍ ഡെപ്യൂട്ടി ഡയറക്ടര്‍ ജനറല്‍ ആര്‍.കെ. ഗൗതം തുടങ്ങിയവരും മന്ത്രാലയത്തിലെ മറ്റ് മുതിര്‍ന്ന ഉദ്യോഗസ്ഥരും വിവിധ സംസ്ഥാന ങ്ങളില്‍ നിന്നുള്ള ഉദ്യോഗസ്ഥരും പങ്കെടുത്തു.
