ബോളിവുഡ് താരങ്ങളായ സണ്ണി ഡിയോളും പ്രീതി സിന്റയും തങ്ങളുടെ വരാനിരിക്കുന്ന ചരിത്ര ചിത്രമായ ‘ബട്വര 1947’ ന്റെ പ്രമോഷൻ തിരക്കിലാണ്. ചിത്രം ഓഗസ്റ്റ് 14 ന് റിലീസ് ചെയ്യുമെന്നാണ് പ്രതീക്ഷിക്കുന്നത് . പ്രമോഷണൽ കാമ്പെയ്നിന്റെ ഭാഗമായി താരങ്ങൾ ഇന്ന് ലഖ്നൗ സന്ദർശിച്ച് ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെ കണ്ടു.
ഈ സന്ദർശനത്തിന്റെ ചിത്രങ്ങളും താരങ്ങൾ സോഷ്യൽ മീഡിയയിൽ പങ്കുവെച്ചു. സന്ദർശന വേളയിൽ മുഖ്യമന്ത്രി യോഗി ആദിത്യനാഥിന് രാം ലല്ല വിഗ്രഹമാണ് സണ്ണി ഡിയോൾ സമ്മാനമായി നൽകിയത്. സിനിമയുടെ പ്രചാരണത്തിനായി സണ്ണി ഡിയോൾ, പ്രീതി സിന്റ, കരൺ ഡിയോൾ എന്നിവർ വെള്ളിയാഴ്ചയാണ് ലഖ്നൗ സന്ദർശിച്ച് ആരാധകരുമായി സംവദിച്ചത്. നഗരത്തിലുടനീളമുള്ള പ്രമോഷണൽ പരിപാടികളിലും അവർ പങ്കെടുത്തു. ഉത്തർപ്രദേശ് മുഖ്യമന്ത്രിയുടെ ഓഫീസിലേക്ക് പോകുന്നതിനുമുമ്പ് പ്രശസ്തമായ ‘റൂമി ഗേറ്റിന്’ സമീപം പരമ്പരാഗത ടോങ്ക സവാരിയും അവർ ആസ്വദിച്ചു.
‘ ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെ ലഖ്നൗവിൽ വെച്ച് കാണാൻ കഴിഞ്ഞതിൽ സന്തോഷമുണ്ട്. അദ്ദേഹവുമായി വളരെ സൗഹാർദ്ദപരമായ സംഭാഷണം നടന്നു‘ എന്ന് സണ്ണി ഡിയോൾ ഇൻസ്റ്റാഗ്രാമിൽ പോസ്റ്റ് ചെയ്തു.
രാജ്കുമാർ സന്തോഷി സംവിധാനം ചെയ്യുന്ന ഈ ചിത്രം ‘ആമിർ ഖാൻ പ്രൊഡക്ഷൻസ്’ ആണ് നിർമ്മിക്കുന്നത്.ഇന്ത്യാ വിഭജനത്തിന്റെ കഥ പറയുന്ന ചിത്രമാണ് ബട്വര 1947.’ബട്വാര 1947′ രാഷ്ട്രീയ നിലപാട് അവതരിപ്പിക്കുന്ന സിനിമയല്ലെന്നും, വിഭജനത്തിന്റെ ദുരന്തത്തിൽ കുടുങ്ങിയ സാധാരണ മനുഷ്യരുടെ കഥ മാത്രമാണിതെന്നും സണ്ണി ഡിയോൾ വ്യക്തമാക്ക്കിയിരുന്നു.
