ലണ്ടന്: ടി20 ക്രിക്കറ്റ് ചരിത്രത്തില് എക്കാലത്തെയും മികച്ച റണ്വേട്ടക്കാരന് ഇനി ഇംഗ്ലീഷ് താരം ജോസ് ബട്ലറിന്റെ പേരില്. വെസ്റ്റ് ഇന്ഡീസിന്റെ വെടിക്കെട്ട് താരം കെയ്റോണ് പൊള്ളാര്ഡിന്റെ റിക്കാര്ഡാണ് ബട്ലര് മറികടന്നത്. ദി ഹന്ഡ്രഡ് ലീഗില് മാഞ്ചസ്റ്റര് ഒറിജിനല്സിന് വേണ്ടി 27 പന്തില് പുറത്താകാതെ 51 റണ്സ് അടിച്ചുകൂട്ടിയതോടെയാണ് ബട്ലര് പുതിയ റിക്കാര്ഡിട്ടത്.
522 ടി20 മത്സരങ്ങളില് നിന്ന് 10 സെഞ്ച്വറികളും 106 അര്ധസെഞ്ച്വറികളുമടക്കം 14,833 റണ്സാണ് ബട്ലര് ഇതുവരെ അടിച്ചുകൂട്ടിയത്. 14,803 റണ്സാണ് വെസ്റ്റ് ഇന്ഡീസ് ഇതിഹാസം കെയ്റോണ് പൊള്ളാര്ഡിന്റെ പേരിലുണ്ടായിരുന്നത്. 741 മത്സരങ്ങളില്നിന്നാണ് പൊളാര്ഡിന്റെ നേട്ടം. ഏറ്റവും കൂടുതല് ടി-20 കളിച്ച താരവും പൊളാര്ഡാണ്. 14,562 റണ്സുമായി വെസ്റ്റ് ഇന്ഡീസിന്റെ തന്നെ ക്രിസ് ഗെയ്ലാണ് പട്ടികയില് മൂന്നാം സ്ഥാനത്തുള്ളത്.
ഇംഗ്ലണ്ട് താരം അലക്സ് ഹെയ്ല്സ്(14449 റണ്സ്), ഓസ്ട്രേലിയന് ഓപ്പണര് ഡേവിഡ് വാര്ണര്(14284 റണ്സ്) എന്നിവരാണ് പിന്നീടുള്ളവര്. ടി20 ക്രിക്കറ്റിലെ റണ്വേട്ടക്കാരുടെ ആദ്യ അഞ്ച് സ്ഥാനങ്ങളില് ഒരു ഇന്ത്യന് താരം പോലും ഇടം നേടിയിട്ടില്ല. 14,218 റണ്സുമായി ആറാം സ്ഥാനത്തുള്ള വിരാട് കോഹ്ലിയാണ് മുന്നില്.
