കൊച്ചി: ശബരിമലയിലെ മില്മ നെയ്യ് വിതരണത്തിലെ ക്രമക്കേടില് വിജിലന്സ് അന്വേഷണം നടത്താന് ഉത്തരവിട്ട് ഹൈക്കോടതി ദേവസ്വം ബെഞ്ച്. നെയ്യ് ക്രമക്കേടുമായി ബന്ധപ്പെട്ട ആരോപണങ്ങള് പ്രഥമദൃഷ്ട്യാ ഗൗരവതരമാണെന്ന് വിലയിരുത്തിയാണ് നടപടി.
പ്രത്യേക കമ്മീഷണറുടെ റിപ്പോര്ട്ട് പരിഗണിച്ചാണ് കോടതിയുടെ നിര്ണായക ഇടപെടല്. വിഷയം അന്വേഷിക്കാന് വിജിലന്സ് ഡയറക്ടര് പ്രത്യേക അന്വേഷണ സംഘത്തെ (SIT) രൂപീകരിക്കണം. കേസെടുത്ത് ഒരു മാസത്തിനുള്ളില് അന്വേഷണം പൂര്ത്തിയാക്കണമെന്നും പുരോഗതി റിപ്പോര്ട്ട് ഹൈക്കോടതിയില് സമര്പ്പിക്കണമെന്നും കോടതി ആവശ്യപ്പെട്ടു. കേസില് അഴിമതി നിരോധന നിയമത്തിലെ സെക്ഷന് 17 എ പ്രകാരമുള്ള മുന്കൂര് അനുമതി ആവശ്യമില്ലെന്നും വ്യക്തമാക്കി.
ചീഫ് വിജിലന്സ് ആന്ഡ് സെക്യൂരിറ്റി ഓഫീസറുടെ ആഗസ്ത് 2 ലെ റിപ്പോര്ട്ട് ഉടന് വിജിലന്സ് ഡയറക്ടര്ക്ക് കൈമാറാന് കോടതി നിര്ദ്ദേശിച്ചു. അന്വേഷണ വിവരങ്ങള് മാധ്യമങ്ങളോടോ പൊതുജനങ്ങളോടോ വെളിപ്പെടുത്തരുതെന്നും ഉത്തരവിട്ടു. അന്വേഷണ സംഘത്തിന് കോടതിയോട് മാത്രമാണ് മറുപടി പറയാന് ബാധ്യത. അന്തിമ റിപ്പോര്ട്ട് സമര്പ്പിക്കുന്നതിന് മുന്പ് കോടതിയുടെ മുന്കൂര് അനുമതി വാങ്ങണം.
മില്മ വിതരണം ചെയ്ത 1,61,535 ലിറ്റര് നെയ്യ് പൂര്ണമായും സന്നിധാനത്ത് എത്തിയിട്ടുണ്ടോ എന്ന കാര്യത്തില് റിപ്പോര്ട്ടില് സംശയം പ്രകടിപ്പിച്ചിട്ടുണ്ട്. തമിഴ്നാട്ടിലെ കുങ്കുമരാജ് ഡയറി ലിറ്ററിന് 369 രൂപ നിരക്കില് മികച്ച ഗുണനിലവാരമുള്ള നെയ്യ് നല്കാന് തയാറായിരുന്നു.ഇത് മറികടന്നാണ് ലിറ്ററിന് 510 രൂപ നിരക്കില് മില്മയ്ക്ക് കരാര് നല്കിയത്. ദേവസ്വം കമ്മീഷണറുടെ എതിര്പ്പ് മറികടന്ന് മുന് ദേവസ്വം ബോര്ഡ് പ്രസിഡന്റ് പി എസ് പ്രശാന്ത് മില്മയില് നിന്ന് നെയ്യ് വാങ്ങാന് തീരുമാനിക്കുകയായിരുന്നു.ദേവസ്വം മുന് ഉദ്യോഗസ്ഥന് അന്തരിച്ച മുരാരി ബാബുവും ഈ ടെന്ഡര് അട്ടിമറിക്ക് മുന്കൈ എടുത്തെന്നാണ് റിപ്പോര്ട്ടില് ഉളളത്.
