മിസൂറി(യുഎസ്): സെന്‍റ് ലൂയിസ് റാപിഡ് ആന്‍റ് ബ്ലിറ്റ് സ് ചെസ്സില്‍ റാപിഡ് വിഭാഗത്തില്‍ ഇന്ത്യയുടെ പ്രജ്ഞാനന്ദ കുതിക്കുന്നു. ആദ്യമൂന്ന് റൗണ്ടില്‍ പരമാവധി ഒരു താരത്തിന് നേടാനാവുന്ന ആറ് പോയിന്‍റുകളില്‍ അഞ്ചു പോയിന്‍റും പ്രജ്ഞാനന്ദ നേടി. രണ്ട് വിജയവും ഒരു സമനിലയും ആണ് നേടിയത്.
ആഗോള റാങ്കിങ്ങില്‍ മുന്‍പില്‍ നില‍്ക്കുന്ന രണ്ട് യുഎസ് താരങ്ങളായ ലെവോണ്‍ ആരോണിയന്‍, ഫാബിയാനോ കരുവാന എന്നിവരെയാണ് പ്രജ്ഞാനന്ദ തോല്‍പിച്ചത്. പ്രജ്ഞാനന്ദയ്‌ക്ക് തൊട്ടു പിറകേ നാല് പോയിന്‍റുകള്‍ വീതം നേടി യുഎസ് താരം വെസ്ലി സോയും ഉസ്ബെകിസ്ഥാന്റെ ജോവോഖിര്‍ സിന്‍ഡൊറോവും നിലകൊള്ളുന്നു.
റാപീഡില്‍ ആകെ ഒമ്പത് റൗണ്ടുകളാണുള്ളത്. ഇതില്‍ മൂന്ന് റൗണ്ട് കഴിഞ്ഞു. അമേരിക്കന്‍ ക്യൂബന്‍ ഗ്രാന്‍റ് മാസ്റ്റര്‍ ലെയ്നിയര്‍ ഡൊമിംഗ്വസുമായാണ് പ്രജ്ഞാനന്ദ സമനിലയില്‍ പിരിഞ്ഞത്. കറുത്ത കരുക്കള്‍ ഉപയോഗിച്ച് ഫാബിയാനോ കരുവാനയെ തോല്‍പിച്ചത് പ്രജ്ഞാനന്ദയ്‌ക്ക് വലിയ ആത്മവിശ്വാസം നല്‍കി. ഫ്രഞ്ച് ഡിഫന്‍സിലായിരുന്നു ഇവരുടെ പോരാട്ടം. മധ്യഗെയിമിലെത്തിയപ്പോള്‍ പ്രജ്ഞാനന്ദ ചില ആക്രമണസാധ്യത കണ്ടെത്തികളിക്കുകയായിരുന്നു. കഴിഞ്ഞ വര്‍ഷം സെന്‍റ്ലൂയിസ് റാപിഡില്‍ പ്രജ്ഞാനന്ദ രണ്ടാം സ്ഥാനക്കാരനായിരുന്നു.
