ന്യൂദല്ഹി: ദല്ഹി നിയമസഭാ തെരഞ്ഞെടുപ്പ് പ്രചാരണ വേളയില് നടത്തിയ പ്രസംഗങ്ങളുടെ പേരില് ബിജെപി നേതാക്കളായ, മുന് കേന്ദ്രമന്ത്രി അനുരാഗ് താക്കൂറിനും ദല്ഹി ഉപമുഖ്യമന്ത്രി പര്വേഷ് വര്മ്മയ്ക്കും എതിരായ കേസ് നിലനില്ക്കില്ലെന്ന മുന് വിധിയെ ചോദ്യം ചെയ്ത് സിപിഎം നേതാവ് ബൃന്ദ കാരാട്ട് സമര്പ്പിച്ച പുനഃപരിശോധനാ ഹര്ജി സുപ്രീം കോടതി തള്ളി. പുനഃപരിശോധനാ ഹര്ജി പരിശോധിച്ചതില് നിന്ന് അതിനാവശ്യമായ ഒരു കാരണവും കണ്ടെത്താന് കഴിഞ്ഞിട്ടില്ലെന്ന് ബെഞ്ച് ചൂണ്ടിക്കാട്ടി.
ദല്ഹി നിയമസഭാ തെരഞ്ഞെടുപ്പു കാലത്ത് പൗരത്വ ഭേദഗതി നിയമവുമായി ബന്ധപ്പെട്ട് പ്രകോപനപരമായ പരാമര്ശങ്ങള് നടത്തിയെന്നാണ് കേസ്. ഹൈക്കോടതിയും സുപ്രീംകോടതിയും ഇരുവരെയും കുറ്റവിമുക്തരാക്കിയിരുന്നു.
പുനഃപരിശോധനാ ഹര്ജി തുറന്ന കോടതിയില് കേള്ക്കണമെന്ന ബൃന്ദ കാരാട്ടിന്റെ അപേക്ഷ ജസ്റ്റിസ് വിക്രം നാഥും ജസ്റ്റിസ് സന്ദീപ് മേത്തയും അടങ്ങുന്ന ബെഞ്ച് നേരത്തെ തള്ളിയിരുന്നു.
