മട്ടാഞ്ചേരി: കൊച്ചി അഴിമുഖത്ത് കണ്ടെയ്നര് ചരക്ക് കപ്പല് നിയന്ത്രണം വിട്ട് ഒഴുകി നടന്നു. ഒഴുകി നടന്ന കപ്പലിനെ ടഗ്ഗുകള് നിയന്ത്രിച്ച് കെട്ടിവലിച്ചതോടെ വന് ദുരന്തം ഒഴിവായി. ശനിയാഴ്ച രാത്രി പുറംകടലിലേയ്ക്ക് നീങ്ങുന്ന’എസ്എസ്എല് മുംബൈ’ എന്ന കണ്ടെയ്നര് ചരക്ക് കപ്പലാണ് മണിക്കൂറുകളോളം തുറമുഖ മേഖലയില് ഭീകരാന്തരീക്ഷം സൃഷ്ടിച്ചത്.
കപ്പലിലെ യന്ത്ര തകരാറിനെ തുടര്ന്ന് എഞ്ചിന് നിലച്ചതാണ് കാരണം. നിയന്ത്രണം നഷ്ടപ്പെട്ട കപ്പല് ജനവാസ, ടൂറിസം കേന്ദ്രമായ ഫോര്ട്ട്കൊച്ചി കരമേഖലയിലേയ്ക്കാണ് നീങ്ങിയത്. അഴിമുഖത്തെ കോസ്റ്റല് പോലീസ് സ്റ്റേഷനും പഴയ കസ്റ്റംസ് ഓഫീസിനും മുന്നിലൂടെ ഒഴുകി നടന്ന കപ്പലിനെ ഒപ്പമുള്ള കൊച്ചി തുറമുഖ അതോറിറ്റിയുടെ വല്ലാര്പാടം, ഓഷ്യന് എന്റര്പ്രൈസസ്സ് എന്നീ ടഗ്ഗുകള് സമീപത്ത് എത്തി വടം കെട്ടി തുറമുഖ വാര്ഫിലേയ്ക്ക് വലിച്ചു നീക്കി. അപകടസമയം മഴയുണ്ടായിരുന്നെങ്കിലും കാറ്റില്ലാത്തത് കപ്പല് നിയന്ത്രണ ശ്രമങ്ങളെ അനായസമാക്കി. രാത്രി വൈകി കപ്പല് തുറമുഖത്തെ എറണാകുളം വാര്ഫിലെ ക്യൂ ഏഴ് ബെര്ത്തില് നങ്കുരമിട്ട് കെട്ടിയിട്ടു. ശ്രേയസ് ഷിപ്പിങ് ലോജിസ്റ്റിക്കിന്റെ എസ്എസ്എല് മുംബൈ ഗുജറാത്ത് തുറമുഖത്ത് നിന്ന് 31നാണ് വല്ലാര്പാടം ടെര്മിനലിലെത്തിയത്. കണ്ടെയ്നര് കയറ്റിറക്ക് നടത്തി നങ്കൂരമിടാന് പുറം കടലിലേയ്ക്ക് നീങ്ങവേയാണ് ചരക്ക് കപ്പല് അപകടത്തില്പ്പെട്ടത്. മാസങ്ങള്ക്ക് മുന്പ് നിയന്ത്രണം വിട്ട മണ്ണുമാന്തി കപ്പല് കൊച്ചി തീരത്ത് ഒഴുകിയെത്തി കരയില് ഉറച്ചിരുന്നു.
