ഗ്ലാസ്ഗോ: കോമണ്വെല്ത്ത് ഗെയിംസ് 2026ല് ഭാരതം ഒരു ദിവസം കൊണ്ട് വലിയ കുതിപ്പോടെ നാലാം സ്ഥാനത്തേക്ക് മുന്നേറി. ബോക്സിങ് താരങ്ങളുടെ സ്വര്ണ കൊയ്ത്തില് എട്ടാം സ്ഥാനത്ത് നിന്ന് നാലിലേക്ക് വന് കുതിപ്പാണ് നടത്തിയത്. ആതിഥേയ രാജ്യമായ സ്കോട്ട്ലന്ഡിലനെ അഞ്ചാം സ്ഥാനത്തേക്ക് പിന്തള്ളിയാണ് ഭാരതത്തിന്റെ മുന്നേറ്റം. മത്സരത്തിന്റെ അവസാന ഇനം പൂര്ത്തിയാകാന് ഇനിയും സമയമുണ്ടെന്നിരിക്കെ ഓസ്ട്രേലിയ വന് കൂതിപ്പോടെ മുന്നേറ്റം തുടരുകയാണ്. മത്സരങ്ങള് ആരംഭിച്ച ദിവസം മുതല് ഓസ്ട്രേലിയ ഒന്നാം സ്ഥാനത്ത് തുടരുന്നുണ്ട്.
13 സ്വര്ണവും 17 വെള്ളിയും ഒമ്പത് വെങ്കലവും അടക്കം 39 മെഡലുകളുമായാണ് ഭാരതം നാലാം സ്ഥാനത്ത് തുടരുന്നത്. ആഗസ്ത് രണ്ടിന് ആരംഭിച്ച് 11 ദിവസം നീണ്ടു നിന്ന മത്സരങ്ങളുടെ പത്താം ദിവസമാണ് ഭാരതം വന് കുതിപ്പ് നടത്തിയത്. ഭാരതം നേടിയ സ്വര്ണമെഡലുകളില് പകുതിയിലേറെയും ബോക്സിങ്ങ് റിങ്ങില് നിന്നാണ് സ്വന്തമാക്കിയത്. ശനിയാഴ്ച്ച മത്സരിച്ച പത്ത് ബോക്സിങ് ഇനങ്ങളില് പത്തിലും ഫൈനലില് പ്രവേശിച്ചു. ഏഴ് താരങ്ങള് സ്വര്ണം നേടിയപ്പോള് മൂന്ന് പേര് പരാജയപ്പെട്ട് വെള്ളി സ്വന്തമാക്കി. ശനിയാഴ്ച്ച ഉച്ചയ്ക്ക് ശേഷം ആരംഭിച്ച ബോക്സിങ് ഫൈനലുകള് പൂര്ത്തിയായപ്പോള് ഭാരത സമയം ഇന്നലെ പുലര്ച്ചെയായി.
ഇന്നലെ ഭാരതത്തിന് മെഡല് നേട്ടമുണ്ടാക്കാന് സാധിച്ചില്ല.
ഏറ്റവും ഒടുവില് പുരുഷന്മാരുടെ 78 കിലോ ജൂഡോയില് ഭാരതത്തിനായി ഇഷ്രൂപ് നാരംഗ് വെങ്കലത്തിനായി പൊരുതിയെങ്കിലും ഫലമുണ്ടായില്ല. കാനഡയുടെ കോറാലി ഗോഡ്ബൗട്ട് ഇഷ്രൂപിനെ കീഴടക്കി മെഡല് നേടി. നേരത്തെ ഫൈനലില് കയറാനുള്ള മത്സരത്തില് ഇഷ്രൂപ് കാമറൂണ് താരം ജോര്ജിക വെസ്ലിയോട് പരാജയപ്പെട്ടിരുന്നു.
ട്രാക്ക് സൈക്ലിങ്ങിനിറങ്ങിയ ഭാരത താരങ്ങളായ ദിനേശ് കുമാറും ഹര്ഷവീര് സിങ്ങ് സെഖോനും പുരുഷന്മാരുടെ 40 കിലോമീറ്ററില് ആദ്യ റൗണ്ടില് തന്നെ പുറത്തായി. ആയിരം മീറ്റര് ടൈം ട്രയല് ഫൈനലില് മത്സരിച്ച ഭാരത താരം റോണാള്ഡോ സിങ് ലയിറ്റോന്ജം മെഡല് നേടാതെ പുറത്തായി.
