ഗ്ലാസ്‌ഗോ: വിധിയോട് പോരാടി ജയിച്ച് ഭാരതത്തിന് അഭിമാനമായി മാറിയിരിക്കുകയാണ് സോമന്‍ റാണ. കാശ്മീരില്‍ സേവനമനുഷ്ഠിക്കുന്നതിനിടെ ലാന്‍ഡ്മൈന്‍ സ്‌ഫോടനത്തില്‍ ഒരു കാല് നഷ്ടപ്പെട്ട ഈ ഹവില്‍ദാര്‍, ഇച്ഛാശക്തിയും കഠിനാധ്വാനവും കൊണ്ട് കോമണ്‍വെല്‍ത്ത് ഗെയിംസില്‍ സ്വര്‍ണ്ണപ്പതക്കം നേടിയിരിക്കുന്നു.
രാജ്യത്തിന് വേണ്ടി അതിര്‍ത്തിയില്‍ ചോര ചിന്തിയ സോമന്‍ റാണ, അപകടത്തിന് ശേഷവും ജീവിതത്തിന് മുന്നില്‍ മുട്ടുമടക്കാന്‍ തയ്യാറായില്ല. വൈകല്യങ്ങളെ തന്റെ കായിക അഭിനിവേശത്തിന് തടസ്സമാക്കാന്‍ അനുവദിക്കാതെ അതിതീവ്ര പരിശീലനം തുടര്‍ന്ന അദ്ദേഹം, ഭാരതത്തിനായി കോമണ്‍വെല്‍ത്ത് ഗെയിംസ് വേദിയില്‍ കായിക ലോകത്തെ അതിശയിപ്പിക്കുന്ന പ്രകടനമാണ് പുറത്തെടുത്തത്.
സോമന്‍ റാണയുടെ ഈ സമാനതകളില്ലാത്ത നേട്ടം ഭാരത കായിക ചരിത്രത്തിലെ തന്നെ ഏറ്റവും വലിയ പ്രചോദനാത്മക കഥകളിലൊന്നായി മാറി. കളിക്കളത്തില്‍ കാട്ടിയ ഈ പോരാട്ടവീര്യത്തെ ലോകമെമ്പാടുമുള്ള കായിക പ്രേമികളും പ്രമുഖരും ഒന്നടങ്കം നെഞ്ചിലേറ്റുകയാണ്.
‘കാല് നഷ്ടപ്പെട്ടപ്പോഴും രാജ്യത്തിനായി എന്തെങ്കിലും വലിയ നേട്ടം കൈവരിക്കണമെന്ന ആഗ്രഹം മനസ്സില്‍ ഉണ്ടായിരുന്നു. ഇന്ന് ഭാരതത്തിന്റെ ത്രിവര്‍ണ്ണ പതാക വാനോളമുയര്‍ത്താന്‍ സാധിച്ചതില്‍ അതിയായ സന്തോഷവും അഭിമാനവുമുണ്ട്.’ സോമന്‍ റാണ പറഞ്ഞു.
