കൊല്ലം: മുന് മന്ത്രി കെ ബി ഗണേഷ് കുമാര് ഉദ്ഘാടനച്ചടങ്ങ് നിര്വഹിച്ചതിനെ തുടര്ന്ന് എന് എസ് എസ് കരയോഗം പിരിച്ചുവിട്ടു.താല്ക്കാലിക ഭരണസമിതിയെയും എന്എസ്എസ് രജിസ്ട്രാര് നിയോഗിച്ചു.
പത്തനാപുരം താലൂക്ക് എന്എസ്എസ് കരയോഗ യൂണിയന് കീഴിലുള്ള 5785 നമ്പര് കുന്നിക്കോട് ടൗണ് ശ്രീ മഹാദേവ എന്.എസ്.എസ് കരയോഗത്തിനെതിരെയാണ് നേതൃത്വത്തിന്റെ നടപടി.എന്എസ്എസ് നേതൃത്വത്തില് നിന്നും പുറത്താക്കിയ മുന് ഡയറക്ടര് ബോര്ഡ് അംഗവും മുന് താലൂക്ക് യൂണിയന് പ്രസിഡന്റുമായ കെ ബി ഗണേഷ് കുമാറിനെ ആധ്യാത്മിക പഠന കേന്ദ്രത്തിന്റെ ഉദ്ഘാടനത്തിനായി ക്ഷണിച്ചതിനാണ് നടപടി. ഉദ്ഘാടന യോഗത്തില് കെബി ഗണേഷ് കുമാര് എന്എസ്എസ് നേതൃത്വത്തെയും യൂണിയന് ഭരണസമിതി നേതൃത്വത്തെയും രൂക്ഷമായി വിമര്ശിച്ചിരുന്നു. എന്എസ്എസ് നേതൃത്വത്തില് ഏകാധിപത്യം ആണെന്നും വിമര്ശിച്ചിരുന്നു.
ഇതേ തുടര്ന്ന് സമുദായ അംഗങ്ങള് എന്എസ്എസ് നേതൃത്വത്തിന് പരാതി നല്കി. അതില് അന്വേഷണം നടത്തിയ എന്എസ്എസ് നേതൃത്വം പരാതിയില് കഴമ്പുണ്ടെന്ന് കണ്ടെത്തിയാണ് നടപടി സ്വീകരിച്ചത്. കരയോഗത്തിന്റെയും കരയോഗം വക സ്വത്തു വകകളുടെയെല്ലാം ഭരണം എന്എസ്എസ് രജിസ്ട്രാര് നേരിട്ട് ഏറ്റെടുത്തു.കരയോഗം അംഗം കൊട്ടറഴികത്ത് വീട്ടില് രഞ്ജുവിനെ ചെയര്മാന് ആക്കി താല്ക്കാലിക ഭരണസമിതിയെ നിയോഗിച്ചു.
