കൊച്ചി: കശുവണ്ടിയുമായി ബന്ധപ്പെട്ട കോടികളുടെ അഴിമതി കേസില്‍ വിചാരണ നേരിടുന്ന കെ.എ. രതീഷ് ഖാദിബോര്‍ഡ്, റൂട്രോണിക്‌സ് എംഡി പദവികളില്‍ ഇപ്പോഴും തുടരുന്നതിനെതിരെ ഹൈക്കോടതി.ഇത്രവും വലിയ അഴിമതിക്കാരനെയാണോ സുപ്രധാന പദവികളില്‍ സര്‍ക്കാര്‍ ഇരുത്തിയതെന്ന് ചോദിച്ച ഹൈക്കോടതി, രതീഷിന്റെ നിയമനം എങ്ങനെ സാധ്യമാകുമെന്നും ആരാഞ്ഞു.കേസില്‍ നാലാഴ്ചയ്‌ക്കകം മറുപടി നല്‍കാന്‍ സിംഗിള്‍ ബഞ്ച് ഉത്തരവിട്ടു.
അഴിമതിയില്‍ വിചാരണ നേരിടണമെന്ന് കോടതി പറയുകയും സര്‍ക്കാര്‍ പ്രോസിക്യൂഷന്‍ അനുമതി നല്‍കുകയും ചെയ്തിട്ടും കെ.എ. രതീഷ് മൂന്ന് സുപ്രധാന പദവികളിലാണ് തുടരുന്നത്. ഈ സ്ഥാനത്ത് നിന്ന് പുറത്താക്കണമെന്നാവശ്യപ്പെട്ടാണ് പൊതുപ്രവര്‍ത്തകനായ കെ.എം. ഷാജഹാന്‍ ഹൈക്കോടതിയെ സമീപിച്ചത്.
ഖാദിബോര്‍ഡ്, റൂട്രോണികസ് എംഡി സ്ഥാനങ്ങള്‍ക്ക് പുറമെ ഖാദി ക്ഷേമനിധി ബോര്‍ഡ് ചീഫ് എക്‌സിക്യൂട്ടീഫ് ഓഫീസര്‍ തസ്തികയിലും കെ.എ. രതീഷ് തുടരുകയാണെന്ന് ഹര്‍ജിക്കാരന്‍ കോടതിയെ അറിയിച്ചു. ഈ സ്ഥാനം വഹിക്കാന്‍ ഉദ്യോഗസ്ഥന്‍ യോഗ്യനല്ലെന്നും ചൂണ്ടിക്കാട്ടി.
ഇത്രയും വലിയ അഴിമതിക്കാരനെ ഈ പദവികളില്‍ ഇരുത്തുന്നത് എങ്ങനെ എന്നാണ് സര്‍ക്കാറിനോട് കോടതി ചോദിച്ചത്.അഴിമതി നടത്താന്‍ നല്ല സാധ്യതയുള്ള പദവികളാണല്ലോ എന്നും പരിഹസിച്ചു.കേസില്‍ നാലാഴ്ചയ്‌ക്കം മറുപടി നല്‍കാന്‍ സര്‍ക്കാറിനോട് കോടതി ആവശ്യപ്പെട്ടു.
