സീതയെ തേടി ദക്ഷിണദിലേക്ക് സഞ്ചരിക്കുന്നതിനിടയില്, രാമനും ലക്ഷ്മണനും ഭയാനകമായ രൂപത്തില് അടുത്തുവരുന്ന ഒരു കബന്ധനെ, കണ്ടുമുട്ടി. തലയില്ലാത്ത, കൈകാലുകള് മാത്രമുള്ള ഭീകര സത്ത്വം! കബന്ധന് അവരെ ആക്രമിക്കാനടുത്തപ്പോള് അവര് സ്വപ്രതിരോധത്തിനായി പെട്ടെന്നവനെ വധിച്ചു. കബന്ധന്റെ ചിതയില് നിന്ന് അവന്റെ അലൗകികപ്രഭയോടെയുള്ള
ഗന്ധര്വ്വരൂപം
ഉയര്ന്നുവന്ന് രാമന് മുന്നില് നമസ്കരിച്ച്, ശ്രീരാമനെ വിരാട്പുരുഷനായി, എല്ലാ നിലനില്പുകളുടേയും നിതാന്ത സാക്ഷിയായിക്കണ്ട് സ്തുതിചെയ്തു.സ്വര്ഗ്ഗത്തിലേക്ക് ഉയര്ന്നുപോകുന്നതിന് മുമ്പ്, ഗന്ധര്വ്വന് രാമനോട് മാതംഗമുനിയുടെ ആശ്രമം സന്ദര്ശിക്കാന് നിര്ദ്ദേശിച്ചു. അവിടെയാണ് അതീവഭക്തയായ ശബരി രാമന്റെ വരവിനായി ഏറെ നാളായി കാത്തിരിക്കുന്നത്.
ശബരീമോക്ഷം
രാമനും ലക്ഷ്മണനും ശബരിയുടെ ആശ്രമത്തിലേക്ക് പുറപ്പെട്ടു. അവിടെ, രാമഭക്തയായ ശബരി, കണ്ണീര് ചൊരിഞ്ഞ്, അതീവസന്തോഷത്തോടെ ഫലമൂലാദികള് നല്കി അവരെ സ്വാഗതം ചെയ്തു സല്ക്കരിച്ചു. കാട്ടുജാതിക്കാരിയായിരുന്നിട്ടും വനത്തില് തപസ്സുചെയ്യുന്ന ഋഷിമാരെ സേവിക്കാന് അവള് ജീവിതം മുഴുവനും ചെലവഴിച്ചു. അവളുടെ ഭക്തിയില് സന്തുഷ്ടരായ ഋഷിമാര്, ശ്രീരാമനെ നേരിട്ട് കാണുവാനിടയാകുമ്പോള് അവളുടെ ജീവിതലക്ഷ്യം പൂര്ത്തിയാകുമെന്ന് അനുഗ്രഹിച്ചിരുന്നു. ഇപ്പോള്, രാമന്റെ ദിവ്യസാന്നിദ്ധ്യത്തില് അവള് ഏറെ ആഹ്ലാദിച്ചു. ഭക്തിയില്ലെങ്കില് ഒരുവന്റെ ഉന്നതകുലജന്മമോ, പാണ്ഡിത്യമോ, ആചാരങ്ങളോ ഒന്നും തന്നെ ഭഗവദ് പ്രസാദം ലഭിക്കാന് ഉതകുകയില്ല തന്നെ.
ശബരിയുടെ ഭക്തിയിലും വിനയത്തിലും സന്തുഷ്ടനായ രാമന്, കരുണയോടെ അവളുമായി സത്സംഗം ചെയ്തു. ”ഞാന് ഭക്തരുടെ ഇടയില് ജാതിയോ ലിംഗമോ വേര്തിരിച്ചറിയുന്നില്ല. ഏകാഗ്രമായ സ്നേഹവും ഭക്തിയും മാത്രമാണ് അവരെ എന്റെയടുക്കല് കൊണ്ടുവരുന്നത്. ഭക്തിമാര്ഗ്ഗം മോക്ഷത്തിലേക്കുള്ള ഏറ്റവും ഉന്നതമായ പാതയാണ്.” ഭക്തി വളര്ത്താനായി രാമന് ഒന്പത് വഴികള് ശബരിക്ക് വിവരിച്ചു കൊടുത്തു.
ജീവസാഫല്യം നേടി സംതൃപ്തയായ ശബരി, താന് ദിവ്യദൃഷ്ടിയിലൂടെ കണ്ടതായ കാര്യങ്ങള് വെളിപ്പെടുത്തി. ”സീതാദേവി ലങ്കയിലാണുള്ളത്. രാമഭക്തിയില് ഉറച്ചു ദുഃഖിതയായി അവിടെയിരിക്കുന്നു. പമ്പാ നദിക്കരയിലെ ഋഷ്യമൂകപര്വ്വതത്തില് നിവസിക്കുന്ന മര്ക്കടരാജാവ് സുഗ്രീവനെ കണ്ടുപിടിച്ച് അയാളുടെ സഹായം തേടിയാല് ദേവിയെ കണ്ടെത്തുവാന് കഴിയും. സുഗ്രീവനെ കണ്ട് അവനുമായി ഒരു സഖ്യം ഉണ്ടാക്കിയാല് അവന് അങ്ങയുടെ പരിശ്രമത്തിന് ഏറെ സഹായകരമാകും.”
ജീവിതത്തിന്റെ ലക്ഷ്യം പൂര്ത്തിയാക്കിയ ശബരി, തന്റെ ഭൗതിക ശരീരം ഉപേക്ഷിച്ച് പരംപൊരുളില് ലയിക്കുവാന് തന്നെ അനുവദിക്കണമെന്ന് രാമനോട് അഭ്യര്ത്ഥിച്ചു. രാമന്റെ ആശീര്വാദത്തോടെ, അവള് തന്റെ മര്ത്ത്യശരീരം ഉപേക്ഷിച്ച് മോക്ഷം നേടി.
ഭഗവാന് പരമശിവന്, രാമകഥയിലെ ഈ പവിത്രമായ സംഭവങ്ങള് പാര്വതിക്ക് വിവരിച്ചുകൊടുത്തുകൊണ്ട്, ശുദ്ധഹൃദയത്തോടെ രാമനിലേക്ക് തിരിയുന്ന എല്ലാവരെയും രാമന് ആത്മീയോന്നതിയിലേക്ക് നയിക്കുന്നതിന്റെ അത്യന്തം പ്രചോദനപ്രദമായ തത്ത്വങ്ങള് ഉദ്ബോധിപ്പിച്ചു. ഭക്തിയാല് ഉള്ളംനിറഞ്ഞ പാര്വതി, അത്ഭുതകരമായ രാമകഥയുടെ തുടര്ച്ച കേള്ക്കാന് ആകാംക്ഷയോടെ കാത്തിരുന്നു.
ജന്മഭൂമി ഓണ്ലൈന്