വിഭീഷണന് രാമപക്ഷത്തു ചേര്ന്നതിനാലാണ് രാമന് വിജയമുണ്ടായതെന്നും രാവണനെ ഒറ്റിയ വിഭീഷണന് ചെയ്തത് മാപ്പര്ഹിക്കാത്ത കുറ്റമാണെന്നും രാവണപക്ഷപാതികള് എന്നും വാദിച്ചു കാണാറുണ്ട്. എന്നാല് ഇതേ രാവണന് തന്നെ മുമ്പൊരിക്കല് തന്റെ ജ്യേഷ്ഠനെ ചതിച്ചതോ എന്നു തിരിച്ചുചോദിച്ചാല്, ങേ, രാവണനു ജ്യേഷ്ഠനോ? രാവണനല്ലേ മൂത്തത് എന്നു നവരാവണികള് ചോദിച്ചുകളയും. അവരുടെ ഇതിഹാസ അറിവുകള് ഇതിഹാസം വായിച്ചും മനനം ചെയ്തുമുള്ളതല്ല എന്നതിന്റെ കുഴപ്പമാണിത്.
ആരാണ് രാവണന്റെ ജ്യേഷ്ഠന്? സാക്ഷാല് കുബേരന്. ധനപതിയായ കുബേരന് മണിമയമാക്കിയ ലങ്കയെ ആണ് രാവണന് സ്വന്തമാക്കിയത് എന്നത് പലര്ക്കും അറിയാത്ത കാര്യം. ലങ്കമാത്രമല്ല, സീതയെ റാഞ്ചാന് രാവണന് ഉപയോഗിച്ച പറക്കുംരഥമായ പുഷ്പകവും ജ്യേഷ്ഠസഹോദരനായിരുന്ന കുബേരനില് നിന്നു രാവണന് തട്ടിയെടുത്തതാണ്. കൊടുത്താല് കൊല്ലത്തും കിട്ടണമല്ലോ. അതല്ലേ കര്മ്മത്തിന്റെ കാവ്യനീതി! വിഭീഷണനെ വിധിക്കാനും വധിക്കാനും ഒരുങ്ങുംമുമ്പ് രാവണികള് ഇക്കാര്യമൊക്കെ അറിഞ്ഞിരിക്കണം.
ഒരുപാടു ഗുണങ്ങളുടെ വിളനിലമായിരുന്നെങ്കിലും പുരാണ, ഇതിഹാസങ്ങളിലെ ഏറ്റവും സ്ത്രീലമ്പട കഥാപാത്രങ്ങളില് ഒരാളാണ് രാവണന്. വേറെയും പല കൊള്ളരുതായ്മകള് ഉണ്ടെങ്കിലും സ്ത്രീപീഡനം ഒന്നു കൊണ്ടാണ് രാവണന് ഏറ്റവും വെറുക്കപ്പെട്ട വ്യക്തിയാവുന്നത്. അതേസമയം ജ്യേഷ്ഠന് കുബേരനോ? സമ്പത്തിന്റെയും സമൃദ്ധിയുടേയും ദേവനായി കുബേരന് എവിടെയും ആരാധിക്കപ്പെടുന്നു. ദീപാവലി, ധനത്രയോദശി, ഗൃഹപ്രവേശം തുടങ്ങി പല വിശേഷാവസരങ്ങളിലും കുബേര പൂജയുണ്ട്. ഒരാളുടെ വ്യക്തിത്വം നിര്ണ്ണയിക്കുന്നത് ജനനത്താലോ കുടുംബത്താലോ അല്ല, മറിച്ച് അയാളുടെ പ്രവൃത്തി, മൂല്യം, ഭക്തി എന്നിവയലാണ്. ധര്മ്മനിഷ്ഠയിലൂടെ കുബേരന് ദൈവികമായ ആദരവ് നേടിയപ്പോള്, അനിയന്ത്രിതമായ ഭോഗാഭിലാഷം രാവണനു നാശകാരണമായി.
മഹര്ഷി വിശ്രവസ്സിന് ഇളബിളയില് ജനിച്ച മകനാണ് കുബേരന്. വിശ്രവസ്സിനു കൈകേസിയില് ജനിച്ച മകനാണ് രാവണന്. ഇരുവരും ഒരച്ഛന്റെ മക്കള്. അര്ദ്ധ സഹോദരങ്ങള്. അച്ചടക്കം, ജ്ഞാനം, ആത്മീയത എന്നിവയാല് കുബേരന് ശ്രദ്ധേയനായി. അസാമാന്യമേധയും ശിവഭക്തിയും രാവണന് ഉണ്ടായിരുന്നെങ്കിലും ക്രമേണ അഹങ്കാരവും അധികാരഗര്വ്വവും അദ്ദേഹത്തെ കീഴടക്കി.
കുബേരന്റെ ജനനം സമ്പത്തിന്റെ ദേവനായിട്ടല്ലായിരുന്നു. അദ്ദേഹം ആയിരക്കണക്കിന് വര്ഷങ്ങള് ബ്രഹ്മാവിനെ തപസ്സനുഷ്ഠിച്ചു. അതില് സംപ്രീതനായ ബ്രഹ്മാവ്, അമരത്വം, അളവറ്റ സമ്പത്ത്, വടക്കുദിക്കിന്റെ കാവല്ക്കാരനായ ‘ലോകപാലന്’ എന്നീ പദവികള് അദ്ദേഹത്തിന് നല്കി. പ്രപഞ്ച നിധികളുടെ സംരക്ഷണച്ചുമതലയും ഏല്പ്പിച്ചു. കുബേരനു സമ്പത്ത് വ്യക്തിപരമായ ആഡംബരത്തിന് വേണ്ടിയുള്ളതായിരുന്നില്ല; വിശ്വസന്തുലനം നിലനിര്ത്തി ധനവിതരണം നടത്തുന്ന പ്രപഞ്ചഖജനാവ് സൂക്ഷിപ്പുകാരനായി അദ്ദേഹം മാറി. ഭക്തര് കുബേരനോട് കേവലം പണത്തിന് വേണ്ടിമാത്രം അപേക്ഷിച്ചാല് അദ്ദേഹം പ്രസാദിക്കില്ല. മറിച്ച് സത്യസന്ധ മാര്ഗ്ഗത്തിലൂടെ പ്രവര്ത്തിക്കുന്നവരെ സുസ്ഥിരസമ്പത്ത് നല്കി അനുഗ്രഹിക്കുകയാണ് കുബേരന് ചെയ്യുക.
ദേവശില്പിയായ വിശ്വകര്മ്മാവ് നിര്മ്മിച്ച സുവര്ണ്ണ ലങ്ക കുബേരന് സമാധാനപരമായി ഭരിച്ചിരുന്നപ്പോള് അധികാരമോഹിയായ രാവണന് തന്റെ ജ്യേഷ്ഠസഹോദരനെ ആക്രമിച്ചു ലങ്കയും പുഷ്പകവിമാനവും പിടിച്ചെടുക്കുകയായിരുന്നു. ലങ്ക തിരിച്ചുപിടിക്കാന് നില്ക്കാതെ ഹിമാലയത്തിലെ അളകാപുരി കേന്ദ്രമാക്കി കുബേരന് ദേവസേവ തുടര്ന്നു. അഹങ്കാരത്തേക്കാള് കര്ത്തവ്യത്തിനും പ്രതികാരത്തേക്കാള് സമാധാനത്തിനും പ്രാധാന്യം നല്കുന്ന ദേവനായി കുബേരന് കീര്ത്തിക്കപ്പെട്ടപ്പോള് അഹങ്കാരത്തിന്റേയും അക്രമത്തിന്റേയും രാക്ഷസീയമുഖമായി രാവണന് അവമതിക്കപ്പെട്ടു.
