ന്യൂദല്ഹി: ബാങ്ക് ഓഫ് ബറോഡയില് വന് സൈബര് ആക്രമണം നടന്നതായി റിപ്പോര്ട്ട്. ഏകദേശം ഒരു ടിബിയോളം വരുന്ന നിര്ണായക വിവരങ്ങള് ചോര്ന്നതായാണ് പുറത്തുവരുന്ന വിവരം. ഉപഭോക്താക്കളുടെ ബാങ്ക് അക്കൗണ്ട് വിവരങ്ങള്, പേര്, വിലാസം, ആധാര് നമ്പറുകള് എന്നിവയുള്പ്പെടെയുള്ള വിവരങ്ങള് ഡാര്ക്ക് വെബില് സൗജന്യമായി ലഭ്യമാക്കിയിട്ടുണ്ടെന്ന് സൈബര് സുരക്ഷാ വിദഗ്ധര് മുന്നറിയിപ്പ് നല്കി. ഹാക്കര്മാര് ഡാറ്റാ ചോര്ച്ചയുടെ തെളിവായി ചില രേഖകളും ഓണ്ലൈനില് പങ്കുവെച്ചിട്ടുണ്ട്.
‘ക്യാഷ്ലെസ് കണ്സ്യൂമര്’ സ്ഥാപകനായ ശ്രീകാന്ത് ലക്ഷ്മണന് ഈ വിവരങ്ങള് ശരിവയ്ക്കുകയും ഇതൊരു വലിയ സൈബര് ദുരന്തമാണെന്ന് പ്രതികരിക്കുകയും ചെയ്തു. ചോര്ന്ന വിവരങ്ങളില് ബാങ്കിന്റെ ആന്തരിക രേഖകള്, ലോണ് വിവരങ്ങള്, എന്ആര്ഐ കോര്പ്പറേറ്റ് ബാങ്കിങ് വിവരങ്ങള്, കസ്റ്റമര് സപ്പോര്ട്ട് വിവരങ്ങള്, എടിഎം രേഖകള് എന്നിവയും ഉള്പ്പെടുന്നു.
‘ട്രിപ്പിള് എക്സ്’ എന്ന ഹാക്കിങ് ഗ്രൂപ്പാണ് ഇതിന് പിന്നിലെന്നാണ് പ്രാഥമിക നിഗമനം. ഈ വര്ഷം മെയ് മാസത്തില് ഇന്തോനേഷ്യയിലെ ഒരു പ്രമുഖ ബാങ്കില് നിന്നും ഈ സംഘം സമാനമായ രീതിയില് വിവരങ്ങള് ചോര്ത്തിയിരുന്നു. സംഭവത്തെക്കുറിച്ച് ബാങ്ക് ഓഫ് ബറോഡ അന്വേഷണം ആരംഭിച്ചിട്ടുണ്ടെങ്കിലും, ഔദ്യോഗികമായി ഇതുവരെ പ്രതികരിച്ചിട്ടില്ല. റിസര്വ് ബാങ്കോ, സെര്ട്ട്-ഇന് പോലെയുള്ള മറ്റ് ഏജന്സികളോ ഈ വാര്ത്ത സ്ഥിരീകരിച്ചിട്ടില്ല. രാജ്യത്തെ വിവിധ ശാഖകളില് നിന്നുള്ള വിവരങ്ങളാണ് ചോര്ന്നിരിക്കുന്നതെന്നാണ് റിപ്പോര്ട്ടുകള് വ്യക്തമാക്കുന്നത്.
