കേരളത്തില് 52 പേര്ക്ക് അവസരം
ഓണ് ദി ജോബ് ട്രെയിനിങ് 12 മാസം
പ്രതിമാസ സ്റ്റൈപ്പന്റ് 15000 രൂപ
ഓണ്ലൈനില് ഡിസംബര് ഒന്നിനകം അപേക്ഷിക്കാം
കേന്ദ്ര പൊതുമേഖലയില്പ്പെടുന്ന ബാങ്ക് ഓഫ് ബറോഡ വിവിധ സംസ്ഥാനങ്ങളിലെ ബ്രാഞ്ചുകളിലേക്ക് അപ്രന്റീസുകളെ തെരഞ്ഞെടുക്കുന്നു. ആകെ 2700 ഒഴിവുകളുണ്ട്. കേരളത്തില് 52 പേര്ക്കാണ് അവസരം. തമിഴ്നാട്ടില് 159, കര്ണാടകത്തില് 440 എന്നിങ്ങനെയാണ് ഒഴിവുകള്. ഓരോ സംസ്ഥാന/കേന്ദ്രഭരണ പ്രദേശത്തും ലഭ്യമായ ഒഴിവുകള്, യോഗ്യത, സെലക്ഷന് നടപടികള്, അപേക്ഷിക്കേണ്ട രീതി അടക്കമുള്ള വിജ്ഞാപനം www.bankofbaroda.bank.in- ല് ലഭിക്കും. അതത് സംസ്ഥാനത്തെ പ്രാേദശിക ഭാഷയില് പ്രാവീണ്യമുണ്ടായിരിക്കണം. ഒരാള്ക്ക് ഒരു സംസ്ഥാനത്തേക്ക് മാത്രമേ അപേക്ഷിക്കാന് പാടുള്ളൂ. അപ്രന്റീസ് ആക്ട് പ്രകാരമാണ് നിയമനം. അപേക്ഷകര് ഗവണ്മെന്റ് അപ്രന്റീസ് പോര്ട്ടലായ www.apprenticeshipindia.gov.in- ല് രജിസ്റ്റര് ചെയ്യണം.
യോഗ്യത: ഏതെങ്കിലും ഡിസിപ്ലിനില് അംഗീകൃത സര്വ്വകലാശാലാ ബിരുദം. പ്രായപരിധി 20-28 വയസ്. എസ്സി/എസ്ടി/ഒബിസി/പിഡബ്ല്യുബിഡി വിഭാഗങ്ങളില്പ്പെടുന്നവര്ക്ക് നിയമാനുസൃത വയസ്സിളവുണ്ട്.
അപേക്ഷാ ഫീസ്: 800 രൂപ+ജിഎസ്ടി. ഭിന്നശേഷിക്കാര്ക്ക് (പിഡബ്ല്യുബിഡി) 400+ജിഎസ്ടി മതി. പട്ടികജാതി/വര്ഗ്ഗ വിഭാഗങ്ങള്ക്ക് ഫീസില്ല. വിജ്ഞാപനത്തിലെ നിര്ദ്ദേശങ്ങള് പാലിച്ച് ഓണ്ലൈനില് ഫീസ് അടച്ച് അപേക്ഷിക്കാം. ഡിസംബര് ഒന്ന് വരെ അപേക്ഷ സ്വീകരിക്കും.
സെലക്ഷന്: ഓണ്ലൈന് പരീക്ഷ, ഡോക്കുമെന്റ്/സര്ട്ടിഫിക്കറ്റ് പരിശോധന, ലോക്കല് ലാംഗുവേജ് ടെ സ്റ്റ് എന്നിവയുടെ അടിസ്ഥാനത്തിലാണ് തെരഞ്ഞെടുപ്പ്. ഒബ്ജക്ടീവ് മാതൃകയിലുള്ള ഓണ്ലൈന് പരീക്ഷയില് ജനറല്/ഫിനാന്ഷ്യല് അവയര്നസ്, ക്വാണ്ടിറ്റേറ്റീവ് ആന്റ് റീസണിങ് ആപ്ടിട്യൂഡ്, കമ്പ്യൂട്ടര് നോളഡ്ജ്, ജനറല് ഇംഗ്ലീഷ് എന്നിവയിലുള്ള പ്രാവീണ്യം അളക്കുന്ന 100 ചോദ്യങ്ങളുണ്ടാവും. പരമാവധി 100 മാര്ക്കിന്. 60 മിനിട്ട് സമയം അനുവദിക്കും. ഉത്തരം തെറ്റിയാല് നെഗറ്റീവ് മാര്ക്കില്ല.
തെരഞ്ഞെടുക്കപ്പെടുന്നവര്ക്ക് 12 മാസത്തെ ഓണ് ദി ജോബ് ട്രെയിനിങ് നല്കും. പ്രതിമാസം 15000 രൂപയാണ് സ്റ്റൈപ്പന്റ്. കൂടുതല് വിവരങ്ങള് വിജ്ഞാപനത്തിലുണ്ട്.
