ഗ്ലാസ്ഗോ: കോമണ്വെല്ത്ത് ഗെയിംസില് ലോണ് ബോള്സ് വനിതാ ടീമിലൂടെ ഭാരതം ആദ്യ വിജയം സ്വന്തമാക്കി. ഗ്രൂപ്പ് ബിയിലെ ഉദ്ഘാടന മത്സരത്തില് മാള്ട്ടയെ ടൈബ്രേക്കറില് തോല്പ്പിച്ചാണ് ഭാരതത്തിന്റെ വിജയം.
ഭാരതത്തിനായി രൂപ റാണ ടിര്ക്കിയും പിങ്കിയുമാണ് മത്സരത്തിനിറങ്ങിയത്. നാല് വര്ഷം മുമ്പ് ബിര്മിങ്ങാമില് സ്വര്ണം നേടി ചരിത്രം കുറിച്ച ടീമാണ് ഭാരതത്തിന്റേത്. ഇന്നലെ മാള്ട്ടയുടെ റിക്സന് സിസ്റ്റേഴ്സ് എന്ന് വിളിക്കുന്ന റബെക്ക ലൂയിസ്, കണി ലേയ് എന്നിവരെയാണ് ഭാരതം തോല്പ്പിച്ചത്.
മത്സരത്തിന്റെ ആദ്യ പതുതി തീരുമ്പോള് ഭാരത വനിതകള് 7-1ന് മുന്നിലായിരുന്നു. രണ്ടാം പകുതിയില് 4-3നായിരുന്നു വിജയം.
പുടുല് സോനോവാള് അട്ടിമറി ജയം നേടി
ഗ്ലാസ്ഗോ: ലോണ് ബോള്സ് പുരുഷ സിംഗിള്സ് മത്സരത്തില് ഭാരതത്തന്റെ പുടുല് സോണോവാള് അട്ടിമറി ജയം സ്വന്തമാക്കി. നിലവിലെ ലോക ചാമ്പ്യന് താരമായ കാനഡയുടെ റയാന് ബെസ്റ്ററിനെ ആണ് തോല്പ്പിച്ചത്.
മത്സരത്തിന്റെ ആദ്യ സെറ്റ് സോനോവാള് 5-4ന് പിടിച്ചെടുത്തു. രണ്ടാം സെറ്റില് 7-3ന് ബെസ്റ്റെര് പിടിച്ചെടുത്തു. തുടര്ന്ന് നടന്ന ടൈ ബ്രേക്കര് പോരാട്ടത്തില് ഭാരതതാരം വിജയം സ്വന്തമാക്കുകയായിരുന്നു. അസാം പോലീസില് സേവനമനുഷ്ടിച്ച് വരുന്ന സോനോവാള് പ്രാഥമിക ഘട്ടത്തിലെ അടുത്ത മത്സരത്തില് ഫാക്ക്ലാന്ഡ് ഐലന്ഡില് നിന്നുള്ള സെസില് അലെക്സാണ്ടറെ ആയിരിക്കും നേരിടുക.
