ന്യൂദല്ഹി: അയോധ്യ രാമക്ഷേത്ര ഫണ്ട് തട്ടിപ്പ് കേസ് രാഷ്ട്രീയവല്ക്കരിക്കുന്നതിനെതിരെ സുപ്രീം കോടതിയുടെ മുന്നറിയിപ്പ് . ‘ഇതൊരു മുന്നറിയിപ്പാണ്. ഈ വിഷയം രാഷ്ട്രീയവല്ക്കരിക്കരുത്. കോടതികള് രാഷ്ട്രീയത്തിനുള്ള സ്ഥലമല്ല. ഒരു ലളിതമായ ക്രിമിനല് കേസ് മാത്രമാണിത്. ശരിയായ അന്വേഷണം ഉറപ്പാക്കുകയാണ് ഞങ്ങളുടെ ലക്ഷ്യം’ ചീഫ് ജസ്റ്റിസ് സൂര്യകാന്ത് പറഞ്ഞു.
ക്ഷേത്രഫണ്ട് ദുരുപയോഗം സംബന്ധിച്ച കേസ് സി.ബി.ഐ അന്വേഷിക്കണമെന്ന് ആവശ്യപ്പെട്ടുള്ള പൊതുതാല്പ്പര്യ ഹര്ജികള് പരിഗണിക്കവെയാണ് ചീഫ് ജസ്റ്റിസ് അദ്ധ്യക്ഷനായ ബഞ്ച് ഈ നിരീക്ഷണം നടത്തിയത്.
കോടതിയുടെ മുന് നിര്ദ്ദേശപ്രകാരം ഇതുവരെയുള്ള അന്വേഷണറിപ്പോര്ട്ട് സര്ക്കാര് കോടതിയില് സമര്പ്പിച്ചു.
അന്വേഷണത്തിനായി എസ്ഐടി രൂപീകരിക്കാന് കഴിയുമോ എന്ന് അറിയിക്കാന്
ഉത്തര്പ്രദേശ് സര്ക്കാരിനു വേണ്ടി ഹാജരായ സോളിസിറ്റര് ജനറല് തുഷാര് മേത്തയോട് കോടതി നിര്ദേശിച്ചു.
സുതാര്യത ഉറപ്പാക്കാന് ഡിജിറ്റല് രേഖകള് സംരക്ഷിക്കുന്നതിനും കേസില് രജിസ്റ്റര് ചെയ്ത എഫ്ഐആര് അപ്ലോഡ് ചെയ്യുന്നതിനും നിര്ദ്ദേശങ്ങള് നല്കണമെന്ന് മറ്റ് അഭിഭാഷകര് ആവശ്യപ്പെട്ടപ്പോള് എല്ലാ രേഖകളും സൂക്ഷിച്ചിട്ടുണ്ടെന്ന് തുഷാര് മേത്ത ഉറപ്പുനല്കി.
കേസ് 27 ന് വീണ്ടും പരിഗണിക്കും.
