ന്യൂദല്ഹി: ടാര് ഉരുക്കി ഒഴിക്കേണ്ട. റോഡ് ബ്ലോക്ക് ചെയ്ത് ബുദ്ധിമുട്ടുണ്ടാക്കുകയോ റോഡ് റോളര് ഉപയോഗിച്ച് സമയമോ കളയേണ്ട. അഞ്ച് മിനിട്ടില് റോഡിലെ കുഴിയടയ്ക്കുന്ന അത്യാധുനിക ഓട്ടോമാറ്റിക്ക് മെഷീന് ദല്ഹിയിലെ നിരത്തുകളില് പൊതുമരാമത്ത് വിഭാഗം പ്രവര്ത്തിപ്പിച്ച് തുടങ്ങി.
‘സ്പ്രേ, ഇന്ജക്ഷന്, പാച്ചിങ്’ എന്ന മെഷീനാണ് ദല്ഹി നിരത്തുകളില് നിമിഷങ്ങള്കൊണ്ട് കുഴിയടച്ച് തുടങ്ങിയത്. ആഴത്തിലുള്ള കുഴികള്, പൈപ്പുകള്ക്കും കേബിളുകള്ക്കുമൊക്കെയായി റോഡ് മുറിച്ച് എടുക്കുന്ന കുഴികള്, വിള്ളലുകള് തുടങ്ങിയവയെല്ലാം ഈ മെഷീന് ഉപയോഗിച്ച് അടയ്ക്കാം. കുഴിയിലെ പൊടിയും മാലിന്യവും വെള്ളവുമൊക്കെ ഉയര്ന്ന മര്ദ്ദത്തില് വായു കടത്തിവിട്ട് വൃത്തിയാക്കിയശേഷം ബിറ്റുമിന് എമല്ഷന്റെ കോട്ടിങ് നല്കും. ഉയര്ന്ന മര്ദത്തില് തന്നെ എമല്ഷന് കലര്ത്തിയ മിശ്രിതം കുഴിയിലേക്ക് സ്പ്രേ ചെയ്ത് നിറച്ചു കഴിഞ്ഞാല് അതിവേഗത്തില് തന്നെ മിശ്രിതം കുഴിയില് ഉറയ്ക്കും. അതിനാല് റോഡ് റോളര് വേണ്ട.
പരമ്പാരാഗത രീതിയില് ടാറുരുക്കി മെറ്റലുമായി കൂട്ടിക്കലര്ത്തി എടുക്കേണ്ട. കുഴിയടയ്ക്കാന് ആവശ്യമുള്ള മിശ്രിതം മെഷീന് തന്നെ തയാറാക്കി ഉപയോഗിക്കും. മിശ്രിതം പാഴായിപ്പോവുകയുമില്ല. മഴക്കാലത്ത് പോലും ഉപയോഗിക്കാവുന്ന മെഷീന് പരീക്ഷണാടിസ്ഥനത്തില് പ്രവര്ത്തിപ്പിച്ച് തുടങ്ങിയപ്പോള് തന്നെ മികച്ച പ്രതികരണമാണ് ഉണ്ടാകുന്നത്. പണി കഴിഞ്ഞാലുടന് വാഹനങ്ങള്ക്ക് അതിലൂടെ കടന്നുപോകുകയും ചെയ്യാം. പരമാവധി അഞ്ച് മിനിട്ടില് കുഴിയടച്ച് തീരും. സാധാരണ ടാറിങ് മിശ്രിതത്തേക്കാള് കൂടുതല് കാലം നിലനില്ക്കുകയും ചെയ്യും. വിരലില് എണ്ണാവുന്ന തൊഴിലാളികള് മതി എന്നതാണ് മറ്റൊരു പ്രത്യേകത.
