തിരുവനന്തപുരം: നാഷണല് സ്റ്റുഡന്സ് പര്യാവരണ് കോമ്പറ്റീഷന്റെ സംസ്ഥാനതല ഉദ്ഘാടനം ഗവര്ണര് രാജേന്ദ്ര വിശ്വനാഥ് ആര്ലേക്കര് ലോക്ഭവനില് നിര്വ്വഹിച്ചു.
കേന്ദ്ര വിദ്യാദ്യാസ മന്ത്രാലയത്തിന്റെയും വനം പരിസ്ഥിതി മന്ത്രാലയത്തിന്റെയും സഹകരണത്തോടെ 2022 മുതല് നാഷണല് സ്റ്റുഡന്സ് പര്യാവരണ് കോമ്പറ്റീഷന് (എന്എസ്പിസി) ദേശവ്യാപകമായി നടന്നുവരുന്നു. വിദ്യാര്ത്ഥികളില് പരിസ്ഥിതി ബോധവല്ക്കരണവും പരിസ്ഥിതി പ്രവര്ത്തനങ്ങളില് സാമൂഹ്യ പങ്കാളിത്തവും ഉണ്ടാക്കുക എന്ന ലക്ഷ്യത്തോടെയാണ് കോമ്പറ്റീഷന് നടത്തുന്നത്. ‘വിത്ത് നട്ട് വൃക്ഷമാക്കാം’ എന്നതാണ് ഈ വര്ഷത്തെ പ്രമേയം. ജൂൈല 15 മുതല് സപ്തം. 15 വരെ നടക്കുന്ന ഈ മത്സരത്തില് പങ്കെടുക്കുന്ന എല്ലാവര്ക്കും സര്ട്ടിഫിക്കറ്റ് ലഭിക്കും.
വിദ്യാര്ത്ഥികളില് പ്രകൃതി സംരക്ഷണത്തിന്റെ പ്രാധാന്യം ബോധ്യപ്പെടുത്തുക എന്ന ഉദ്ദേശ്യത്തോടെ നടക്കുന്ന പ്രവര്ത്തനത്തിന് ഗവര്ണര് വിജയാശംസകള് നേര്ന്നു. കേരളത്തിലെ മുഴുവന് വിദ്യാലയങ്ങളും ഓണ്ലൈന് ക്വിസ് കോമ്പറ്റീഷനില് പങ്കെടുക്കണമെന്ന് അദ്ദേഹം ആഹ്വാനം ചെയ്തു. എന്എസ്പിസി ദേശീയ സഹ സംയോജകന് ഡോ. ഡബ്ല്യു.ജി. പ്രസന്നകുമാര്, സംസ്ഥാന സംയോജക് എ.കെ. സനന്, അഡ്വ. പി. മനോഹര്, പി.എസ്. ജ്യോതിഷ്, കെ.എ. അജിത് കുമാര് എന്നിവര് പങ്കെടുത്തു.
ശാസ്തമംഗലം ശ്രീശാരദാ കോളജ് ഓഫ് നഴ്സിങ്, കേരള ജൈവവൈവിധ്യ ബോര്ഡ്, തിരുവനന്തപുരം നഗരസഭ, നെയ്യാറ്റിന്കര നിംസ് മെഡിസിറ്റി എന്നിവിടങ്ങളില് ഉദ്ഘാടനവും പോസ്റ്റര് റിലീസിങ്ങും നടന്നു. ജൈവ വൈവിധ്യ ബോര്ഡ് ചെയര്മാന് ഡോ. എന്. അനില്കുമാര്, നിംസ് മെഡിസിറ്റി എംഡി ഡോ. എം.എസ്. ഫൈസല് ഖാന്, തിരുവനന്തപുരം നഗരസഭ മേയര് വി.വി. രാജേഷ്, രാമകൃഷ്ണ ആശ്രമം അധ്യക്ഷന് സ്വാമി മോക്ഷവൃതാനന്ദ തുടങ്ങിയവര് വിവിധ പരിപാടികളില് സംസാരിച്ചു. കേരളത്തിലെ വിവിധ ജില്ലകളിലും എന്എസ്പിസിക്ക് തുടക്കമായി.
