തൃശൂര്: കേരളത്തിലും മറ്റ് സംസ്ഥാനങ്ങളിലും വിദേശരാജ്യങ്ങളിലുമായി മെഡിക്കല്, ആരോഗ്യശാസ്ത്ര കോഴ്സുകളിലേക്ക് പ്രവേശനം നേടാന് ആഗ്രഹിക്കുന്ന വിദ്യാര്ത്ഥികളും രക്ഷിതാക്കളും കോളജിന്റെയും കോഴ്സിന്റെയും നിയമസാധുതയും അംഗീകാരവും കൃത്യമായി പരിശോധിച്ച ശേഷമേ പ്രവേശനം നേടാവൂവെന്ന് കേരള ആരോഗ്യശാസ്ത്ര സര്വകലാശാല വൈസ് ചാന്സലര് പ്രൊഫ. ഡോ. മോഹനന് കുന്നുമ്മല് അറിയിച്ചു.
കേരളത്തില് മെഡിക്കല്, ഡെന്റല്, നഴ്സിങ്, ഫാര്മസി, അനുബന്ധ ആരോഗ്യശാസ്ത്ര ബിരുദ കോഴ്സുകള് നടത്താന് കേരള ആരോഗ്യ ശാസ്ത്ര സര്വകലാശാലയുടെ അംഗീകാരവും അഫിലിയേഷനും നിര്ബന്ധമാണ്. എന്നാല് ആവശ്യമായ അംഗീകാരമില്ലാതെ നിരവധി സ്ഥാപനങ്ങള് നഴ്സിങ്, അനുബന്ധ ആരോഗ്യശാസ്ത്ര ബിരുദ- ഡിപ്ലോമ കോഴ്സുകള് നടത്തുന്ന സാഹചര്യമുണ്ടെന്ന് വിസി ചൂണ്ടിക്കാട്ടി. കേരള ആരോഗ്യ ശാസ്ത്ര സര്വകലാശാലയെ കൂടാതെ കോയമ്പത്തൂരിലുള്ള അമൃത വിശ്വവിദ്യാപീഠം ഡീംഡ് ടു ബി സര്വകലാശാലക്ക് മാത്രമാണ് അവരുടെ കേരളത്തിലെ സ്ഥാപനങ്ങളില് ആരോഗ്യശാസ്ത്ര പ്രോഗ്രാമുകള് നടത്താന് അനുമതിയുള്ളത്. ബിഎസ്സി നഴ്സിങ്, ജിഎന്എം, ഒപ്റ്റോമെട്രി, മെഡിക്കല് ലബോറട്ടറി ടെക്നോളജി, റേഡിയോളജി, ഓപ്പറേഷന് തിയേറ്റര് ടെക്നോളജി, കാര്ഡിയാക് കെയര് ടെക്നോളജി തുടങ്ങി നിരവധി അനുബന്ധ ആരോഗ്യശാസ്ത്ര കോഴ്സുകളിലേക്ക് ചില സ്ഥാപനങ്ങള് നിയമപരമായ അംഗീകാരങ്ങള്, അഫിലിയേഷന്, കോഴ്സിന്റെ നിയമസാധുത എന്നിവ വ്യക്തമായി വെളിപ്പെടുത്താതെ വിദ്യാര്ത്ഥികളെ പ്രവേശിപ്പിക്കുന്നതായി വിവരം ലഭിച്ചിട്ടുണ്ടെന്നും അദ്ദേഹം പറഞ്ഞു. ഇത്തരം സ്ഥാപനങ്ങളുടെ അവകാശവാദങ്ങള് മാത്രം വിശ്വസിക്കാതെ, ബന്ധപ്പെട്ട സര്വകലാശാലയുടെയും സ്റ്റാറ്റിയൂട്ടറി കൗണ്സിലുകളുടെയും അംഗീകാരം ഉറപ്പാക്കണമെന്ന് വിദ്യാര്ത്ഥികളോടും രക്ഷിതാക്കളോടും അദ്ദേഹം നിര്ദേശിച്ചു.
അനുബന്ധ ആരോഗ്യശാസ്ത്ര ബിരുദ കോഴ്സുകള് കേരള ആരോഗ്യ സര്വകലാശാലയുടെയോ അമൃത വിശ്വവിദ്യാപീഠത്തിന്റെയോ അംഗീകാരമുള്ളതാണെന്നും പഠനം പൂര്ത്തിയാക്കിയശേഷം ബന്ധപ്പെട്ട അലൈഡ് ഹെല്ത്ത് പ്രൊഫഷണല് കൗണ്സിലില് രജിസ്ട്രേഷന് ലഭിക്കുന്നതിന് അര്ഹതയുണ്ടെന്നും വിദ്യാര്ത്ഥികള് ഉറപ്പാക്കണം. പാരാമെഡിക്കല് ഡിപ്ലോമ കോഴ്സുകള് സര്ക്കാര് അംഗീകൃതമായിരിക്കണമെന്നും അദ്ദേഹം പറഞ്ഞു.
കേരളത്തില് ഓണ്ലൈന് വഴിയോ കറസ്പോണ്ടന്സ് രീതിയിലോ മെഡിക്കല്, ആരോഗ്യശാസ്ത്ര കോഴ്സുകള്ക്ക് കേരള ആരോഗ്യ സര്വകലാശാല അംഗീകാരം നല്കുന്നില്ല. പ്രത്യേകിച്ച് ഹോമിയോപ്പതിയില് കറസ്പോണ്ടന്സ് കോഴ്സുകള് നിയമപരമായി അനുവദനീയമല്ല. ഇത്തരം അംഗീകാരമില്ലാത്ത സര്ട്ടിഫിക്കറ്റുകള് നേടിയവര്ക്ക് പ്രൊഫഷണല് രജിസ്ട്രേഷന് ലഭിക്കില്ല. അത്തരം യോഗ്യതയുടെ അടിസ്ഥാനത്തില് ചികിത്സ നടത്തിയാല് അവരെ നിയമപരമായി വ്യാജ ചികിത്സകരായി കണക്കാക്കുമെന്നും വൈസ് ചാന്സലര് മുന്നറിയിപ്പ് നല്കി. അംഗീകാരമുള്ള നാച്ചുറോപ്പതി ഡിഗ്രി പ്രോഗ്രാമുകള് ഒന്നും തന്നെ നിലവില് കേരളത്തില് നടത്തുന്നില്ല എന്നും അദ്ദേഹം കൂട്ടിച്ചേര്ത്തു. വിദേശത്ത് എംബിബിഎസ് പഠിക്കാന് ആഗ്രഹിക്കുന്നവര് നിര്ബന്ധമായും നീറ്റ് പരീക്ഷ വിജയിച്ചിരിക്കണം. പ്രവേശനം നേടുന്ന രാജ്യത്തെ മെഡിക്കല് റെഗുലേറ്ററി അതോറിറ്റി അംഗീകരിച്ച കോഴ്സാണോയെന്നും പിന്നീട് ഭാരതത്തില് ആ ബിരുദത്തിന് അംഗീകാരം ലഭിക്കുമോയെന്നും മുന്കൂട്ടി പരിശോധിക്കണം. വിദേശത്ത് എംബിബിഎസ് പൂര്ത്തിയാക്കി ഭാരതത്തിലേക്ക് മടങ്ങുന്നവര് നിലവിലെ ചട്ടങ്ങള് പ്രകാരം ഫോറിന് മെഡിക്കല് ഗ്രാജുവേറ്റ് പരീക്ഷ വിജയിക്കുകയും രാജ്യത്ത് നിര്ബന്ധമായും ഒരു വര്ഷത്തെ ഇന്റേണ്ഷിപ്പ് പൂര്ത്തിയാക്കുകയും ചെയ്യണം.
മോഡേണ് മെഡിസിന്, ഡെന്റല്, ആയുര്വേദം, യൂണാനി, സിദ്ധ, ഹോമിയോപ്പതി, നഴ്സിംഗ്, ഫാര്മസി, അനുബന്ധ ആരോഗ്യശാസ്ത്ര കോഴ്സുകള് മറ്റ് സംസ്ഥാനങ്ങളില് പഠിക്കാന് പോകുന്നവരും ബന്ധപ്പെട്ട സര്വകലാശാലയുടെയും സ്റ്റാറ്റിയൂട്ടറി കൗണ്സിലുകളുടെയും അംഗീകാരം, സ്ഥാപനത്തിന്റെ നിയമസാധുത, കോഴ്സ് പൂര്ത്തിയാക്കിയാല് പ്രൊഫഷണല് രജിസ്ട്രേഷന് അര്ഹത ലഭിക്കുമോ എന്നീ കാര്യങ്ങള് ഉറപ്പാക്കണമെന്ന് വിസി നിര്ദേശിച്ചു. പരസ്യങ്ങളെയോ സ്ഥാപനങ്ങളുടെ അവകാശവാദങ്ങളെയോ മാത്രം ആശ്രയിക്കാതെ ബന്ധപ്പെട്ട സര്വകലാശാലകളിലും റെഗുലേറ്ററി കൗണ്സിലുകളിലും നിന്ന് വിവരങ്ങള് ഉറപ്പാക്കിയ ശേഷമേ പ്രവേശനം നേടാവൂവെന്നും പ്രൊഫ. ഡോ. മോഹനന് കുന്നുമ്മല് അഭ്യര്ത്ഥിച്ചു.
