ഇടുക്കി: മേലുദ്യോഗസ്ഥരെ അസഭ്യം പറയുകയും ഭീഷണിപ്പെടുത്തുകയും ചെയ്ത സിവില്‍ പൊലീസ് ഓഫീസറെ അന്വേഷണ വിധേയമായി സസ്പന്‍ഡ് ചെയ്തു.ഇടുക്കി ജില്ലാ പൊലീസ് ആസ്ഥാനത്ത് സേവനമനുഷ്ഠിക്കുന്ന അഖില്‍ മാത്യുവിനെയാണ് അന്വേഷണ വിധേയമായി സര്‍വീസില്‍ നിന്ന് സസ്‌പെന്‍ഡ് ചെയ്തത്.
2026 ഏപ്രില്‍ 18-നാണ് സംഭവം ഉണ്ടായത്. ഇടുക്കി ഡിവൈഎസ്പി ഓഫീസിലേക്ക് ഫോണ്‍ ചെയ്ത അഖില്‍ മാത്യു അന്ന് ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥനോട് അസഭ്യം പറയുകയും ഭീഷണിപ്പെടുത്തുകയുമായിരുന്നു.പുറമെ പൊലീസ് സേനയിലെ മേലുദ്യോഗസ്ഥരെ അധിക്ഷേപിക്കുകയും ഭീഷണിപ്പെടുത്തുകയും ചെയ്തു.വകുപ്പുതല പരിശോധനയില്‍ ഗുരുതരമായ സ്വഭാവദൂഷ്യവും അച്ചടക്കലംഘനവും നടത്തിയതായി കണ്ടെത്തി.
തുടര്‍ന്നാണ് ഇടുക്കി ജില്ലാ പൊലീസ് മേധാവി ഡോ. എ. നസീം , അഖില്‍ മാത്യുവിനെ സര്‍വീസില്‍ നിന്ന് സസ്‌പെന്‍ഡ് ചെയ്ത് ഉത്തരവിറക്കിയത്. വീടിന് മുന്നില്‍ ഉണ്ടായ വഴക്ക് അന്വേഷിക്കാന്‍ എത്തിയ ഇടുക്കി പൊലിസ് സ്റ്റേഷനിലെ എസ്‌ഐയെയും അസഭ്യം പറഞ്ഞിരുന്നു. നേരത്തെ സസ്‌പെന്‍ഷന്‍ കഴിഞ്ഞ് സര്‍വീസില്‍ വീണ്ടും കയറിയതാണ് ഈ പൊലീസ് ഉദ്യോഗസ്ഥന്‍.
