കൊച്ചി: ഡിജി യാത്ര പ്ലാറ്റ്ഫോമില് രജിസ്റ്റര് ചെയ്യുന്നതിന് ആധാര് വിശദാംശങ്ങള് നിര്ബന്ധമല്ലെന്ന് ഹൈക്കോടതി. ഡിജി യാത്ര പ്ലാറ്റ്ഫോം വഴി വിമാനത്താവളങ്ങളില് ശേഖരിക്കുന്ന യാത്രക്കാരുടെ ഡാറ്റയുടെ സുരക്ഷയെക്കുറിച്ച് ആശങ്കകള് ഉന്നയിച്ച് സി ആര് നീലകണ്ഠന് സമര്പ്പിച്ച പൊതുതാല്പ്പര്യ ഹര്ജി പരിഗണിക്കവെയാണ് ചീഫ് ജസ്റ്റിസ് സൗമെന് സെന് , ജസ്റ്റിസ് ശ്യാം കുമാര് വിഎം എന്നിവരടങ്ങിയ ഡിവിഷന് ബെഞ്ച് ഇക്കാര്യം പറഞ്ഞത്.
2023 ലെ ഡിജിറ്റല് പേഴ്സണല് ഡാറ്റ പ്രൊട്ടക്ഷന് ആക്ട് പ്രകാരം ഡിജിറ്റല് ഇന്റര്ഫേസ് സുരക്ഷിതമല്ലെന്ന് ഹര്ജിയില് ആരോപിച്ചു.
കെ.എസ്. പുട്ടസ്വാമി കേസില് സുപ്രീം കോടതി നിര്ദ്ദേശിച്ച പ്രകാരം സര്ക്കാരിന് ആധാര് വിശദാംശങ്ങള് നിര്ബന്ധിക്കാന് കഴിയില്ലെന്ന് ചീഫ് ജസ്റ്റിസ് സൗമെന് സെന് വാക്കാല് പറഞ്ഞു.
തുടര്ന്ന് കേസ് രണ്ടാഴ്ചത്തേക്ക് മാറ്റിവയ്ക്കുകയും പ്ലാറ്റ്ഫോമില് രജിസ്റ്റര് ചെയ്യുന്നതിന് മറ്റേതെങ്കിലും തിരിച്ചറിയല് രേഖ മതിയോ എന്ന് അറിയിക്കാന് നിര്ദ്ദേശിക്കുകയും ചെയ്തു.
ആരോഗ്യപരമായ കാരണങ്ങളാല് തന്റെ കക്ഷി പൊതുതാല്പര്യ ഹര്ജി പിന്വലിക്കാന് ആഗ്രഹിക്കുന്നുവെന്ന് ഹര്ജിക്കാരന്റെ അഭിഭാഷകന് അറിയിച്ചെങ്കിലും,ഹര്ജി സമര്പ്പിച്ചതിനാല് കോടതി ആവശ്യം നിരസിച്ചു.
