ബൈക്കനൂര്: മലയാളികള്ക്ക് അഭിമാനമായി ഡോ. അനില് മേനോനെയും വഹിച്ച് റഷ്യന് നിര്മിത സോയൂസ് എം എസ് 29 ബഹിരാകാശത്തേക്ക് കുതിച്ചുയര്ന്നു.ബഹിരാകാശത്ത് എത്തുന്ന ആദ്യ മലയാളിയാകാനുളള യാത്രയിലാണ് ഡോ. അനില് മേനോന്.
കസാഖിസ്താനിലെ ബൈക്കനൂര് കോസ്മോഡ്രോമില് നിന്നും കുതിച്ചുയര്ന്ന പേടകത്തില് അനില് മേനോന് ഉള്പ്പെടെ മൂന്ന് യാത്രികരാണ്.ഇവര് രാജ്യാന്തര ബഹിരാകാശ നിലയത്തില് പ്രവേശിക്കുക ബുധനാഴ്ച പുലര്ച്ചെ 1.26നാണ്.
ഡോ. അനില് മേനോനെ കൂടാതെ കോസ്മോനോട്ടുകളായ പ്യൂറോ ദുബ്രോവ്, അന്ന കികിന എന്നിവരാണ് അന്താരാഷ്ട്ര ബഹിരാകാശ നിലയത്തിലേക്ക് യാത്ര ചെയ്യുന്നത്. സോയൂസ് 2.1 എ റോക്കറ്റാണ് വിക്ഷേപണ വാഹനം. വിക്ഷേപണം കഴിഞ്ഞ് മൂന്ന് മണിക്കൂര് ഒന്പത് മിനിട്ട് യാത്ര ചെയ്ത് രാത്രി 11.26ന് പേടകം സഞ്ചാരികളുമായി അന്താരാഷ്ട്ര ബഹിരാകാശ നിലയത്തില് ഡോക് ചെയ്യും. എട്ട് മാസം നീളുന്ന ബഹിരാകാശ വാസത്തിനിടെ നൂറിലധികം ശാസ്ത്രീയ പരീക്ഷണങ്ങളും ഗവേഷണങ്ങളും സംഘം നടത്തും.
വൈദ്യശാസ്ത്രത്തിലും എന്ജിനീയറിംഗിലും ബിരുദമുള്ള ഡോ അനില് മേനോന് 2014ല് ഫ്ലൈറ്റ് സര്ജന് ആയാണ് ആദ്യം നാസയുടെ ഭാഗമാകുന്നത്.സ്പേസ് എക്സുമായും ചേര്ന്ന് പ്രവര്ത്തിച്ചു. 2021ലാണ് നാസയുടെ ബഹിരാകാശ സഞ്ചാരികളുടെ പട്ടികയിലേക്ക് അദ്ദേഹം തിരഞ്ഞെടുക്കപ്പെടുന്നത്. യുഎസ് സ്പേസ് ഫോഴ്സില് ലെഫ്റ്റനന്റ് കേണല് കൂടിയാണ് അനില് മേനോന്. പാലക്കാട് ഒറ്റപ്പാലം സ്വദേശി ശങ്കരന് മേനോന് ആണ് അനിലിന്റെ പിതാവ്. മാതാവ് എലിസബത്ത് യുക്രൈന് സ്വദേശിനി. ഡോ അനില് മേനോന് ജനിച്ചതും വളര്ന്നതും അമേരിക്കയിലെ മിനിയപോളിസില്.
അനിലിന്റെ തയ്യാറെടുപ്പുകള്ക്ക് വര്ഷങ്ങളുടെ പഴക്കമുണ്ട്. മിനിയപ്പലിസില് ജനിച്ച അദ്ദേഹം ഹാര്വാര്ഡ് സര്വകലാശാലയില് നിന്ന് ന്യൂറോബയോളജിയില് ബിരുദം നേടി. പിന്നീട് മെക്കാനിക്കല് എഞ്ചിനിയറിങ്ങില് സ്റ്റാന്ഫോര്ഡില് നിന്ന് മാസ്റ്റേഴ്സ് കരസ്ഥമാക്കി. അമേരിക്കന് വ്യോമസേനയില് കേണലായും സേവനമനുഷ്ഠിച്ചു. സ്റ്റാന്ഫോര്ഡില് നിന്ന് വൈദ്യശാസ്ത്ര പഠനവും ഒപ്പം നാസയില് സോഫ്റ്റ് ടിഷ്യു മൊഡലുകളെ പറ്റി ഗവേഷണവും നടത്തി. ആയിരത്തിലേറെ മണിക്കൂര് പറന്ന സെര്ട്ടിഫൈഡ് ഫ്ലൈറ്റ് ഇന്സ്ട്രക്ടര് കൂടിയായ അനില് മേനോന് നാസയില് ഫ്ലൈറ്റ് സര്ജനായി. പിന്നെ സ്പേസ് എക്സിന്റെ ആദ്യ മനുഷ്യബഹിരാകാശ ദൗത്യങ്ങളിലും ഫ്ലൈറ്റ് സര്ജനായി. ബഹിരാകാശ വൈദ്യശാസ്ത്രത്തില് ഇരുപതിലേറെ പ്രബന്ധങ്ങള് രചിച്ച പ്രതിഭാശാലി കൂടിയാണ് അനില്. നാസയുടെ ഇരുപത്തിമൂന്നാം ആസ്ട്രനോട്ട് ഗ്രൂപ്പിലേക്ക് അനില് തെരഞ്ഞെടുക്കപ്പെട്ടത് ഈ അസാധാരണ മികവിന്റെ ബലത്തിലാണ്. വൈദ്യശാസ്ത്രവുമായി ബന്ധപ്പെട്ട പഠനം ഇദ്ദേഹം നടത്തും.
