ആലപ്പുഴ: ഹരിപ്പാട് പിലാപ്പുഴ സുപ്രഭ ഭവനില് ബസന്തിന്റെയും മിനിയുടെയും മകള് സാവരിയ ബസന്ത് ഉസ്ബെകിസ്ഥാനില് മതപരിവര്ത്തനത്തിന് വഴങ്ങാത്തതിന് കൊല്ലപ്പെട്ട സംഭവത്തില് സിബിഐ അന്വേഷണത്തിന് സംസ്ഥാന സര്ക്കാര് ശിപാര്ശ ചെയ്യണമെന്ന് ബിജെപി ആലപ്പുഴ സൗത്ത് ജില്ലാ സെക്രട്ടറി സന്ദീപ് വാചസ്പതി വാര്ത്താസമ്മേളനത്തില് ആവശ്യപ്പെട്ടു. മറ്റൊരു രാജ്യത്ത് നടന്ന കൊലപാതകം ക്രൈംബ്രാഞ്ച് അന്വേഷിക്കുമെന്ന് പറഞ്ഞ് ആഭ്യന്തരമന്ത്രി, സാവരിയയുടെ കുടുംബത്തെയും പൊതുസമൂഹത്തെയും അവഹേളിക്കുകയാണ്.
വിദേശരാജ്യത്ത് മലയാളി മെഡിക്കല് വിദ്യാര്ത്ഥിനി കൊല്ലപ്പെട്ട സംഭവത്തില് കേരളത്തിലെ പൊതുസമൂഹവും, രാഷ്ട്രീയ, സൂമൂഹ്യനേതൃത്വവും പുലര്ത്തുന്ന മൗനം അപകടകരമാണ്. സാവരിയയുടെ മൃതദേഹത്തോട് പോലും ആദരവ് പ്രകടിപ്പിക്കാന് സംസ്ഥാന സര്ക്കാര് തയാറായില്ല. സാവരിയ ഈ നാടിന്റെ മകളാണ്, വിദേശ രാജ്യത്ത് കുറ്റകൃത്യം ചെയ്യുന്നതിനിടെയല്ല സാവരിയ കൊല്ലപ്പെട്ടത്. മലയാളിയായ മതഭീകരന്റെയും കുടുംബത്തിന്റെയും മതപരിവര്ത്തന ആവശ്യത്തിന് വഴങ്ങാത്തതിനാണ് മൃഗീയമായി കൊലപ്പെടുത്തിയത്. കാല്വിരല് മുതല് തല വരെ ക്രൂരമായ മര്ദ്ദനമേറ്റതിന്റെ പാടുകള് മൃതദേഹത്തിലുണ്ടായിരുന്നു.
നോര്ക്കയോ സംസ്ഥാന സര്ക്കാരോ സാവരിയയുടെ കുടുംബത്തെ തിരിഞ്ഞു നോക്കിയില്ല. സര്ക്കാരും, പ്രധാന പ്രതിപക്ഷവും ആരെയോ ഭയക്കുകയാണ്. ഇബ്നുസീനാ ബുക്കാറ മെഡിക്കല് യൂണിവേഴ്സിറ്റിയുടെ കേരളത്തിലെ പ്രധാന ഏജന്സി മുസ്ലീംലീഗ് സംസ്ഥാന അദ്ധ്യക്ഷന് പാണക്കാട് സയ്യിദ് റഷീദ് അലി തങ്ങള് ചെയര്മാനായ കോട്ടയ്ക്കല് ഐഎല്എം( ഇനിഷ്യേറ്റീവ് ലേണിങ് മെഡിസിന്) ആണ്. ഇതോണോ ഭയത്തിന് കാരണമെന്നും സന്ദീപ് ചോദിച്ചു.
സാവരിയയുടെ മരണ വിവരം അറിഞ്ഞ് ഉസ്ബെക്കിസ്ഥാനിലെത്തിയ ബന്ധുവിനോട് കേസ് ഒതുക്കി തീര്ക്കണമെന്ന് ആവശ്യപ്പെട്ട് എത്തിയത് അവിടുത്തുകാരനാണ്. പ്രതി മലപ്പുറം പെരിന്തല്മണ്ണ സ്വദേശി സദറുള് അനത്തിന് അവരുമായുള്ള ബന്ധം എന്താണെന്ന് അന്വേഷിക്കണം. ഇവിടുത്തെ ചിലരുടെ താല്പ്പര്യപ്രകാരമാണോ സദറുള് അനം പ്രവര്ത്തിച്ചതെന്നും അന്വേഷിക്കേണ്ടതുണ്ട്. അന്താരാഷ്ട്രമാനമുള്ള ഈ കേസ് സിബിഐയാണ് അന്വേഷിക്കേണ്ടത്.
ഈ ആവശ്യം ഉന്നയിച്ച് ബുധനാഴ്ച ബിജെപി ജില്ലയിലെ എല്ലാ മണ്ഡലങ്ങളിലും സായാഹ്നധര്ണ നടത്തും, പ്രതിഷേധാഗ്നി തെളിയിക്കും. വരും ദിവസങ്ങളില് സംസ്ഥാനമെമ്പാടും സമരപരിപാടികള് ബിജെപി നടത്തും. ഹിന്ദു ആയതുകൊണ്ടാണോ സാവരിയയ്ക്കും, കുടുംബത്തിനും നീതി കിട്ടാത്തതെന്ന ചോദ്യം പൊതുസമൂഹത്തില് നിന്ന് ഉയരുന്നു. ഒരു പ്രത്യേക മതവിഭാഗത്തില്പ്പെട്ടവര്ക്ക് മാത്രമാണോ കേരളത്തില് നീതി ലഭിക്കുക. ഹിന്ദുക്കള് രണ്ടാംകിടയായി മാറുന്ന സ്ഥിതിവിശേഷം ഒഴിവാക്കണം. സാവരിയയ്ക്കും കുടുംബത്തിനും നീതി ലഭിക്കാന് കേരളീയ പൊതുസമൂഹം മത, രാഷ്ട്രീയഭേദമന്യേ ഒന്നിക്കണമെന്നും സന്ദീപ് അഭ്യര്ത്ഥിച്ചു. സൗത്ത് ജില്ലാ ജനറല് സെക്രട്ടറി അഡ്വ. കെ. കെ. അനൂപ്, ഹരിപ്പാട് മണ്ഡലം പ്രസിഡന്റ് പി. സുമേഷ് എന്നിവര് വാര്ത്താസമ്മേളനത്തില് പങ്കെടുത്തു.
