ജോർജിയ: അമേരിക്കയില് ഗൂഗിള് സീനിയര് എഞ്ചിനീയറായി ജോലി ചെയ്യുന്ന ഇന്ത്യന് വംശജയായ വനിതാ എന്ജിനിയറെ ഭര്ത്താവ് വെടിവെച്ച് കൊന്നു. കുടുംബ വഴക്കിനെ തുടര്ന്നാണ് ഭര്ത്താവ് വെടിവെച്ചു കൊലപ്പെടുത്തിയത്.
ശീതള് വ്രസെയിന് (57) ആണ് കൊലപ്പെട്ടത്. വെടിവെയ്പ്പില് ഇവരുടെ മകനും പരിക്കേറ്റിട്ടുണ്ട്. ഇവരുടെ ഭര്ത്താവ് കിര്ക് വ്രസെയിനെ പൊലീസ് അറസ്റ്റ് ചെയ്തു. ചൊവ്വാഴ്ച രാത്രി ജോര്ജ്ജിയയിലെ കോബ് കൗണ്ടിയിലായിരുന്നു സംഭവം.
ഇവരുടെ മകന് ജേസണ് വ്രസെയിനെ വീടിന്റെ പുറത്തുവെച്ചും ശീതളിനെ വീടിനകത്തുമാണ് വെടിയേറ്റ നിലയില് കണ്ടെത്തിയത്. ദമ്പതികള്ക്കിടയിലുണ്ടായ തര്ക്കമാണ് വെടിവെയ്പ്പിലേക്ക് എത്തിച്ചതെന്നാണ് പൊലീസിന്റെ വിശദീകരണം. ഐടി മേഖലയില് ഇരുപത് വര്ഷത്തിലേറെ പ്രവൃത്തിപരിചയമുള്ള ശീതള് നിലവില് ഗൂഗിളിലെ എന്ജിനീയറിങ്ങ് ലീഡറായി പ്രവര്ത്തിക്കുകയായിരുന്നു.
