കോഴിക്കോട്: കെഎസ്ആര്‍ടിസി ബസില്‍ കണ്ടക്ടറെ തോക്ക് ചൂണ്ടി ഭീഷണിപ്പെടുത്തി പണം കവര്‍ന്ന പ്രതി 36 വര്‍ഷങ്ങള്‍ക്ക് ശേഷം പിടിയിലായി.മലപ്പുറം ഊര്‍ങ്ങാട്ടിരി സ്വദേശി വി കെ ജോസിനെ മൈസൂരുവില്‍ വച്ചാണ് തിരുവമ്പാടി പൊലീസ് അറസ്റ്റ് ചെയ്തത്. പ്രതിയുടെ താമസസ്ഥലത്ത് നിന്ന് തോക്ക് പൊലീസ് കണ്ടെത്തി
തിരുവമ്പാടി- കൂമ്പാറ റൂട്ടിലോടുന്ന കെഎസ്ആര്‍ടിസി ബസിലെ കണ്ടക്ടറെ, പ്രതിയായ ജോസ് തോക്ക് ചൂണ്ടി ഭീഷണിപ്പെടുത്തി പണം തട്ടിയത് 1990ലാണ്. തിരുവമ്പാടി പൊലീസ് അന്ന് കേസെടുത്തെങ്കിലും പ്രതിയെ കിട്ടിയില്ല. മോഷണത്തിന് പിന്നാലെ മൈസൂരുവിലേക്ക് കടക്കുകയായിരുന്നു ജോസ്. ശിവകുമാര്‍ എന്ന പേരില്‍ വിവിധ ജോലികള്‍ ചെയ്ത് ജീവിച്ചു വന്ന ഇയാള്‍ കഴിഞ്ഞ ആഴ്ച വീട്ടില്‍ പ്രശ്‌നം ഉണ്ടാക്കിയപ്പോള്‍ ഭാര്യ പൊലീസ് കണ്‍ട്രോള്‍ റൂമില്‍ വിളിച്ച് സഹായം അഭ്യര്‍ത്ഥിച്ചു. പരാതി പരിശോധിക്കാന്‍ എത്തിയ നരസിംഹരാജ സ്റ്റേഷനിലെ ഉദ്യോഗസ്ഥര്‍ക്ക് പ്രതിയുടെ പെരുമാറ്റത്തില്‍ സംശയം തോന്നി.
തുടര്‍ന്ന് പൊലീസ് ഇവരുടെ താമസസ്ഥലം പരിശോധിച്ചു. ഇതിനിടയിലാണ് കിടക്കയുടെ അടിയില്‍ നിന്നും തോക്കും തിരിച്ചറിയല്‍ രേഖകളും ലഭിക്കുന്നത്. പിന്നാലെ കേരള പൊലീസിനെ വിവരം അറിയിച്ചു. തിരുവമ്പാടി എസ്‌ഐയും സംഘവും മൈസൂരുവിലെത്തി പ്രതിയെ തിരിച്ചറിഞ്ഞതോടെ അറസ്റ്റ് രേഖപ്പെടുത്തി.കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു
