പാടുന്ന പാട്ടിന്റെ ആത്മാവിനെ ഉള്ളിലേക്കാവാഹിക്കാനും മറ്റാര്ക്കും കഴിയാത്ത രീതിയില് അതൊരു ഗാനശില്പമാക്കി മാറ്റാനും കഴിവുള്ള ഗായികയായിരുന്നു ജാനകിയമ്മ.
ഭാവാവിഷ്കാരത്തില് ചക്രവര്ത്തിനി തന്നെയാണ് ജാനകിയമ്മ. തെലുങ്കിലും തമിഴിലുമൊക്കെ ജാനകിയമ്മ പാടിവെച്ച പല പാട്ടുകളും മറ്റ് ഭാഷകളിലേക്ക് മൊഴിമാറ്റി പാടേണ്ടി വന്നിട്ടുണ്ട് എനിക്ക്. ഒറിജിനല് പാട്ടില് അമ്മ കൊണ്ടുവന്ന ഭാവാവിഷ്കാരത്തോട് പൂര്ണമായി നീതി പുലര്ത്തുക അസാധ്യം.
കുട്ടിക്കാലം മുതലേ ആ ശബ്ദം എനിക്കൊപ്പമുണ്ട്. റേഡിയോയില് ആദ്യം കേട്ട് ‘സൂര്യകാന്തി’യും ‘തളിരിട്ട കിനാക്കളു’മൊക്കെ അന്നേ മനസില് പതിഞ്ഞിരുന്നു. ദാസേട്ടനൊപ്പമുള്ള ആദ്യകാല സ്റ്റേജ് പരിപാടികളിലും ജാനകിയമ്മയുടെ യുഗ്മഗാനങ്ങളാണ് അധികവും പാടിയത്.
ഒരു നവരാത്രിക്കാലത്ത് ആദ്യമായി കണ്ട ദിവസം തന്നെ സ്നേഹവാത്സല്യങ്ങള് കൊണ്ട് എന്നെ കീഴടക്കി.
സംഗീത ദേവത തന്നെയാണ് ജാനകിയമ്മ. അവരോടൊപ്പം കുറേസമയം ചെലവഴിച്ച ശേഷം ഓരോ തവണയും വിടപറയുമ്പോള് വല്ലാത്ത നഷ്ടബോധം തോന്നും. സംസാരിച്ച് ഫോണ് വെച്ചാല് പോലും വലിയൊരു ശൂന്യതയാണ് മനസില്.
