തിരുവനന്തപുരം: കേരള ക്രിക്കറ്റ് ലീഗിന്റെ മൂന്നാം സീസണിനുള്ള താരലേലം പൂര്ത്തിയായി. സിബിന് ഗിരീഷാണ് വിലകൂടിയ താരം. ആലപ്പി റിപ്പിള്സ് 11.80ലക്ഷം രൂപയ്ക്കാണ് സിബിനെ സ്വന്തമാക്കിയത്. കൃഷ്ണദേവനും സച്ചിന് ബേബിയുമാണ് കൂടുതല് തുക നേടിയ മറ്റ് താരങ്ങള്. കൃഷ്ണദേവനെ 11.20ലക്ഷത്തിന് കാലിക്കറ്റ് ഗ്ലോബ് സ്റ്റാര്സ് സ്വന്തമാക്കിയപ്പോള് സച്ചിന് ബേബിയെ പത്ത് ലക്ഷം രൂപയ്ക്ക് ആലപ്പി റിപ്പിള്സും ടീമിലെത്തിച്ചു. 18 താരങ്ങളെ വിവിധ ടീമുകള് നേരത്തെ തന്നെ നിലനിര്ത്തിയിരുന്നു. ശേഷിക്കുന്ന 89 പേരെയാണ് വിവിധ ടീമുകള് ലേലത്തിലൂടെ സ്വന്തമാക്കിയത്.
സി കാറ്റഗറിയില്പ്പെട്ട താരമായ സിബിന്റെ അടിസ്ഥാന വില 75,000 രൂപയായിരുന്നു. ആലപ്പി റിപ്പിള്സിന് പുറമെ കാലിക്കറ്റ് ഗ്ലോബ് സ്റ്റാര്സും തൃശൂര് ടൈറ്റന്സും കൊച്ചി ബ്ലൂ ടൈഗേഴ്സും സിബിനായി രംഗത്തുണ്ടായിരുന്നു. ഏരീസ് കൊല്ലം സെയിലേഴ്സും തൃശൂര് ടൈറ്റന്സും നാല് താരങ്ങളെ വീതവും കാലിക്കറ്റ് ഗ്ലോബ് സ്റ്റാര്സും ട്രിവാണ്ഡ്രം റോയല്സും മൂന്ന് താരങ്ങളെ വീതവും കൊച്ചി ബ്ലൂ ടൈഗേഴ്സും ആലപ്പി റിപ്പിള്സും വീതം നിലനിര്ത്തിയിരുന്നു. ബാക്കിയുള്ളവര്ക്കായാണ് ലേലം നടന്നത്. ഓരോ ടീമിനും പരമാവധി 50 ലക്ഷം രൂപയാണ് ചെലവഴിക്കാന് കഴിയുമായിരുന്നത്.
എ കാറ്റഗറിയില് ഓള് റൗണ്ടര്മാരായ അബ്ദുള് ബാസിദിനെ എട്ട് ലക്ഷത്തിന് കാലിക്കറ്റ് ഗ്ലോബ് സ്റ്റാര്സും അഭിജിത് പ്രവീണിനെ ആറ് ലക്ഷത്തിന് ആലപ്പി റിപ്പിള്സും സ്വന്തമാക്കി. അജ്നാസിനെ ഏഴ് ലക്ഷത്തിനും ആനന്ദ് കൃഷ്ണനെ 5.20 ലക്ഷത്തിനും കൊല്ലമാണ് സ്വന്തമാക്കിയത്. ബി വിഭാഗത്തില് എം. നിഖില് (6.20 ലക്ഷം), അക്ഷയ് മനോഹര് (4.80 ലക്ഷം) എന്നിവരാണ് കൂടുതല് തുക നേടിയത്. ട്രിവാണ്ഡ്രം റോയല്സാണ് ടീമിലെത്തിച്ചത്. സി വിഭാഗത്തില് 3.80 ലക്ഷത്തിന് അമല് എ. ജിയെ കൊല്ലം സെയിലേഴ്സും എം.എസ്. അഖിലിനെ തൃശൂര് ടൈറ്റന്സും സ്വന്തമാക്കിയപ്പോള് വിപുല് ശക്തിയെ മൂന്ന് ലക്ഷത്തിന് കൊച്ചി ബ്ലൂ ടൈഗേഴ്സും ടീമിലെത്തിച്ചു.
