ന്യൂദല്‍ഹി : സിപിഎം നിര്‍ണായക കേന്ദ്രകമ്മിറ്റിയോഗത്തില്‍ പങ്കെടുക്കാതെ ഇപി ജയരാജന്‍.ഇന്ന് കേന്ദ്രകമ്മിറ്റിയില്‍ പങ്കെടുക്കേണ്ടതായിരുന്നെങ്കിലും കണ്ണൂരില്‍ തന്നെ തുടരുകയാണ് അദ്ദേഹം.
ആരോഗ്യ പ്രശ്‌നങ്ങള്‍ മൂലം പങ്കെടുക്കാന്‍ സാധിക്കില്ലെന്ന് ഇപി ജയരാജന്‍ അറിയിച്ചതെന്നാണ് വിവരം. ആയുര്‍വേദ ചികിത്സ ചൂണ്ടിക്കാട്ടി അവധിക്ക് അപേക്ഷിച്ചെന്നും റിപ്പോര്‍ട്ടുണ്ട്. യോഗത്തില്‍ പങ്കെടുക്കാനായി സിപിഎം നേതാക്കളെല്ലാവരും ദില്ലിയിലുണ്ട്.
വിഴിഞ്ഞം ഓഹരി കൈമാറ്റ വിഷയത്തില്‍ പിണറായി വിജയന്റെയും എം വി ഗോവിന്ദന്റെയും അഭിപ്രായത്തോട് വിയോജിച്ച് കൊണ്ടാണ് കഴിഞ്ഞ ദിവസം ഇ പി ജയരാജന്‍ മാധ്യമങ്ങളോട് പ്രതികരിച്ചത്.കെകെ ശൈലജയും പികെ ശ്രീമതിയും സമാന നിലപാടാണ് സ്വീകരിച്ചത്.
അതേസമയം, വിഴിഞ്ഞം ഓഹരി കൈമാറ്റത്തില്‍ സിപിഎമ്മിലെ ഭിന്നാഭിപ്രായങ്ങളില്‍ പിണറായി വിജയന്‍ കടുത്ത അതൃപ്തിയിലെന്നാണ് സൂചന. അതിനിടെ, കണ്ണൂര്‍ ജില്ലാ സെക്രട്ടറി കെകെ രാഗേഷിന് പിന്തുണ ആവര്‍ത്തിച്ച് എംവി ഗോവിന്ദന്‍ രംഗത്തെത്തി. ഇന്ന് എകെ ബാലനും തോമസ് ഐസകും രാഗേഷിന്റെ നിലപാടിനെ പിന്തുണയ്‌ക്കുകയാണ് ചെയ്തത്. രണ്ടു പതിറ്റാണ്ടിനിടെ ആദ്യമായാണ് പിണറായിയുടെ നിലപാടിനോട് കണ്ണൂര്‍ നേതൃത്വത്തില്‍ നിന്ന് തന്നെ എതിര്‍പ്പ് ഉയരുന്നത്.
