കൊച്ചി: കശുവണ്ടി വികസന കോര്പറേഷന് അഴിമതിക്കേസില് ഐഎന്ടിയുസി സംസ്ഥാന പ്രസിഡന്റ് ആര്. ചന്ദ്രശേഖരന് ഉള്പ്പെടെയുള്ള പ്രതികളെ പ്രോസിക്യൂട്ട് ചെയ്യാന് അനുമതി നല്കിയുള്ള പുതിയ ഉത്തരവ് സര്ക്കാര് ഹൈക്കോടതിയില് സമര്പ്പിച്ചു. കേസില് പ്രതികള്ക്കെതിരെ പ്രഥമദൃഷ്ട്യാ തെളിവുകളുണ്ടെന്ന് വ്യക്തമായത് കണക്കിലെടുത്താണ് പുതിയ പ്രോസിക്യൂഷന് അനുമതിയെന്ന് സര്ക്കാര് ഉത്തരവില് വ്യക്തമാക്കിയിട്ടുണ്ട്.
സര്ക്കാരിന്റെ അവകാശം നിലനിര്ത്തിയാണ് ഈ പുതിയ ഉത്തരവ് കോടതിക്ക് കൈമാറിയത്. ഹൈക്കോടതിയുടെ ശക്തമായ സമ്മര്ദ്ദം കാരണമാണ് പ്രതികളെ പ്രോസിക്യൂട്ട് ചെയ്യാന് അനുമതി നല്കുന്നതെന്ന രീതിയിലായിരുന്നു സര്ക്കാര് ഉത്തരവിറക്കിയത്.
കോടതിയെ കുറ്റപ്പെടുത്തുന്ന രീതിയിലുള്ള ഈ പരാമര്ശത്തിനെതിരെ പരാതിക്കാരന് കടകംപളളി മനോജ് കോടതിയലക്ഷ്യ ഹര്ജിയുമായി ഹൈക്കോടതിയെ സമീപിച്ചതോടെയാണ് സര്ക്കാര് നിലപാട് മാറ്റാന് നിര്ബന്ധിതരായത്. സര്ക്കാര് സമര്പ്പിച്ച പുതിയ ഉത്തരവ് ഫയലില് സ്വീകരിച്ച ഹൈക്കോടതി ഹര്ജി ബുധനാഴ്ച വീണ്ടും പരിഗണിക്കും.
ഐഎന്ടിയുസി നേതാവ് ആര്. ചന്ദ്രശേഖരന്, കശുവണ്ടി വികസന കോര്പറേഷന് മുന് എംഡി കെ.എ. രതീഷ് എന്നിവരടക്കമുള്ളവരാണ് പ്രധാന പ്രതികള്.
