ന്യൂദല്ഹി: കോടതി നടപടികളുടെ അനധികൃത റെക്കോഡിംഗുകള് അപ്ലോഡ് ചെയ്യുന്നതും പ്രചരിപ്പിക്കുന്നതും തടയാനാവില്ലെന്ന് ടെക് ഭീമന്മാരായ ഗൂഗിളും മെറ്റയും ദല്ഹി ഹൈക്കോടതിയെ അറിയിച്ചു. ജസ്റ്റിസ് സ്വര്ണ കാന്ത ശര്മ്മയെ നേരില്കണ്ട് അരവിന്ദ് കെജ്രിവാള് സംസാരിക്കുന്നതിന്റെ വീഡിയോകള് അപ്ലോഡ് ചെയ്ത വ്യക്തികള്ക്കെതിരെ നടപടിയെടുക്കണമെന്ന് ആവശ്യപ്പെട്ട് അഭിഭാഷകന് വൈഭവ് സിംഗ് സമര്പ്പിച്ച ഹര്ജിയിലാണ് ഈ സത്യവാങ്മൂലം.
ഇത്തരമൊരു നിര്ദ്ദേശം നിയമപരമായി അംഗീകരിക്കാന് കഴിയാത്തതും നടപ്പാക്കാന് അസാധ്യമായതുമാണ്. ഉപയോക്താവ് സൃഷ്ടിച്ച ഉള്ളടക്കം നിയമാനുസൃതമാണോ എന്ന് സ്വതന്ത്രമായി നിര്ണ്ണയിക്കാനോ നിയമവിരുദ്ധമായേക്കാവുന്നവ നിരീക്ഷിക്കാനോ തങ്ങളെപ്പോലുള്ള ഇടനിലക്കാര്ക്ക് ബാധ്യതയില്ലെന്ന് ഗൂഗിളും മെറ്റയും വാദിച്ചു.
ഇന്ത്യയില് ഇതു സംബന്ധിച്ച നിയമങ്ങളുടെ ഏകോപനമില്ലാത്തതിനാല് അത് ഏതെങ്കിലും നിയമം ലംഘിക്കുന്നുണ്ടോ എന്ന് വിലയിരുത്താന് ബുദ്ധിമുട്ടാണ്.
‘ബാധകമായ നിയമത്തിന്റെ ലംഘനമാണെന്ന് കോടതി വിധിച്ചശേഷം പ്രത്യേകമായി തിരിച്ചറിഞ്ഞ വീഡിയോകള് മാത്രമേ നീക്കം ചെയ്യേണ്ടതുള്ളൂവെന്ന് പ്രതിഭാഗം ചൂണ്ടിക്കാട്ടി. കേസ് ആഗസ്റ്റിലേക്ക് മാറ്റി.
